Египеттеги оппозициянын лидерлеринин бири, Нобелдин сыйлыгынын ээси Мухаммад эл-Барадей “Египет жарылайын деп араң турат” деди жана өлкөдө чоң башаламандык болуп кетпеши үчүн армияны кийлигишүүгө чакырды. Британиянын тышкы иштер министри Уилиям Хейг Египетте бийликти жаңы өкмөткө өткөрүү жолун ырааттуу жүргүзүүгө үндөдү. Франциянын президенти Николя Саркози “Египет демократияга карай кадам жасайт го деп үмүттөнөөрүн” айтты. Ал эми Евробиримдиктин тышкы иштер министри Кэтрин Эштон “Египетте өкмөттү алмаштыра турган убакыт келгенин” билдирди.
