Тынч океанындагы Самоа аралы жыл аягында саатты 1 суткага алдыга которот. Ошентип, өлкө акыркы саат алкагынан биринчиге секирет. Саат айырмасынан улам, Самоа жумасына 2 иш күнүн жоготот. Маселен, аралда жума болгондо, анын негизги соода шериктери Австралия менен Жаңы Зеландияда ишемби болуп калат. Ал эми коңшу мамлекеттерде дүйшөмбү келип, иш башталганда, Самоада дагы эле жекшемби болот. Эми ишкер алакалар кыйла жеңилдейт жана самоалыктар жер шарында биринчи болуп жаңы күндү жана жаңы жылды тосуп алып турушат.
