Кыргызстандын 12 жараны Тажикстандын убактылуу кармоочу жайларында жана тергөө абактарында кармалып жатышат. Бул тууралуу кыргыз акыйкатчысынын маалымат кызматы билдирет. Жакында тажик бийлиги өлкөнүн 20 жылдыгына карата жарыялаган мунапыска байланыштуу 8 кыргызстандык бошотулуп, мекенине кайткан. Учурда камакта жаткан 12 адамдын арасында жашы жете электер жана аялдар жок экени да кабарланууда. Акыйкатчы Турсунбек Акун бүгүн Дүйшөмбү шаарында өтүп жаткан адам укуктары боюнча эл аралык жыйындын ишине катышууда. Акун Тажикстандын акыйкатчысы Зариф Ализода менен да жолугушуп, тажик соту тарабынан 29 жылга эркинен ажыратылган кыргызстандык жаран Салимзод боюнча сүйлөштү. Мүмкүнчүлүк болсо ал Дүйшөмбүнүн тергөө абагына да барат. (RK)
