Ливия бийлиги Каддафини өлтүргөндөр соттолорун убада кылууда

Бийликтеги Улуттук өткөөл кеңештин төрага орун басары Абдел Хафиз Гоганын бүгүн Бенгазидеги басма сөз жыйында билдиргенине караганда, учурда иликтөө иштери башталды жана Каддафинин өлүмүнө ким жоопкер болбосун иши сотто каралат.

Буга чейин Улуттук өткөөл кеңеш Каддафи кичи мекени Сирт шаарында кармалган кезинде атышуудан өлдү деп ырастап келген. Бирок Каддафи кармалгандан кийинки видеотасмалар анын тирүү болгонун көрсөткөнүнө байланыштуу эл аралык коомчулук Ливиянын бийликтерин өлүмдүн жагдайлары боюнча иликтөө жүргүзүүгө чакырган.