"Жарандар коррупцияга каршы" укук коргоо борбору кыргыз өкмөтүн абактардагы абалды талкуулоо үчүн чукул жыйын өткөрүүгө чакырды. Укук коргоочулардын пикиринде, азыркы абалдан чыгуунун жолдору тез арада аныкталышы керек. Алардын айтымында, 18-январда парламентте болгон талкуу жабык жайлар системасын өзгөртүү, гумандуулук принциптерин жайылтуу көйгөйлөрүн эмес, Жаза аткаруу кызматынын жетекчисинин тегерегиндеги жеке маселелерди талкуулоо менен гана чектелди. 16-январда Бишкектеги №1 тергө абагында тополоң чыгып, ошондон бери дээрлик баардык абактарда камалгандар тамактан баш тартышууда. (RK)