Келерки каржы жылында Жапониядагы автомобиль чыгаруучу бул ишкана 10 млрд.долларга чейин таза киреше алат деп күтүлүп жатат. Бүгүн компаниядан билдиришкендей, быйылкы жылдын биринчи кварталында анын кирешеси, былтыркы жылдын ушул мезгилине салыштырмалуу, төрт эсеге өскөн. “Тойотанын” адистери муну азыр дүйнөдө чакан, анча кымбат эмес жана экологиялык талаптарга жооп бере алган моделдерди адамдар көп сатып ала баштаганы менен түшүндүрүшүүдө. Аналитиктер бул ишкана Жапонияда былтыр болгон катуу жер титирөө жана цунаминин кесепетинен толугу менен арылганын айтып жатышат.
