Кыргызстанда ата-энесинен запкы көргөн балдардын саны өсүп жатканын Бишкектеги 3-оорукананын башкы дарыгери Талантбек Өмүрбеков “Азаттыкка” билдирди. Анын айтымында, бир айда 50дөй бала үй-бүлөлүк зордук-зомбулукка кабылганы тууралуу маалымат келип түшсө, алардын төрт-бешөө гана дарыгерлердин жардамына кайрылат. Алардын көпчүлүгү ооруканага оор абалда: баш мээси чайкалган, дене-башы сыйрылган абалда келип түшөт. Кээде бычакталган, өтө кансыраган учурлар кездешет. Балдарды ургандардын эң башында өзгөчө өгөй ата-энелер турат. (KE/KKs)
