Брюсселде чогулган европалык жетекчилер 27 өлкөнүн жети жылдык орток бюджетинин долбоорун караштырууда. 2020-жылга дейре эсептелинген бюджет боюнча, Евробиримдикке кирген өлкөлөр бул мезгил ичинде 960 миллиард евро коротууну пландаштырууда. Эгерде бул долбоор бүгүн кечке чейин бекитилип калса, Евробиримдик алгачкы ирет чыгашаларын кыскартууга барган болот. Британия менен Голландия андан да олуттуу кыскартууларды талап кылса, Франция менен Польша фермерлерге мурдагыдан көбүрөөк дотация берүүнү суранган.
