Ысык-Көлдө кургак учук оорусуна чалдыккандардын саны кыскарууда. Бул тууралуу "Азаттыкка" кургак учукка каршы облустук борбордун директору Жаңыл Акунова билдирди. Жыл башынан бери аталган борборго 234 адам кайрылган. Былтыр ушул эле мезгил аралыгында 242 адам катталган болчу. Акунованын айтымында, быйыл бул илдетке кабылгандардын ичинен 18и балдар. Былтыр 33 бала катталган. Расмий маалымат боюнча, быйыл Кыргызстанда кургак учук менен катталгандардын саны 4476 адам болду, алардын 440ы 14 жашка чейинкилер. Айрыкча Чүйдө жана Бишкекте бул оору көп катталууда. (MK/RK)
