Европа Союзу Албанияга уюма мүчө болууга “талапкер өлкө” макамын берди. Бул жөнүндө ЕБнын кеңейүү боюнча комиссары Штефан Фюле 24-июнда Твиттерде жазды жана макамдын берилишин Албания жетекчилигинин “өлкөнү реформалоо аракетинин үзүрү жана аны колдоо” деп мүнөздөдү. Декабрда Евробиримдик Албаниядан коррупцияга каршы күрөштү чечкиндүү жүргүзүүнү жана мыйзамдуулукту чыңдоону талап кылган. Өлкө мүчөлүккө кабыл алынгандан мурда административдик жана сот системасын европалык стандартка ылайыктап, уюшкан кылмыш топторун жана коррупцияны ооздуктоого тийиш.
Албаниянын социалист премьер-министри Эди Рама өлкө Евросоюз менен кызматташууну бекемдей берерин билдирди.
