Баткендеги Тажикстандын Ворух анклавын айланып өтүүчү Көк-Таш – Ак-Сай – Тамдык унаа жолу сөзсүз курулат. Бул тууралуу бүгүн Бишкекте өткөн маалымат жыйынында өкмөттүн чек ара маселелери боюнча өкүлү Курбанбай Искандаров билдирди.
- Кандай гана провокация болбосун, кандай жагдай түзүлбөсүн, бул жол курулат. Себеби ансыз конфликт коркунучу ар дайым сакталып турат. Чыр-чатактарды болтурбоо үчүн Кыргызстан аны куруп бүтүшү керек, - деди Искандаров.
Жолду улантуу дагы эки апта кийинкиге калтырылганын бүгүн коопсуздук боюнча вице-премьер-министр Абдырахман Маматалиев билдирди. Январда токтогон курулуш 10-июлда уланмак болчу.
Куруу иши быйыл январь айында башталган. Бирок тажик тараптын каршылыгына кабылып, чек арада чыр чыккан. 10-июлда да Тамдык айылында куралдуу кагылыш тутанган.
Маматалиевдин белгилешинче, жолду курууну токтото турууну тажик тарап "кырдаал жөнгөрүлгөнчө" деп өтүндү.
10-июлдагы окуя боюнча эки тараптын версиясы ар башка болуп жаткандыктан Кыргызстан өз көз карашын билдирди. Учурда кыргыз-тажик тобу иликтөө жүргүзө баштады. Тажик тараптын айтымында, алардан 2 адам каза болду жана жетөө жараат алды. Ал эми Кыргызстандан бир аскердин мээси чайкалды. (JsO/RK)
