Соңку эки күн бою тынымсыз жааган кардан жана катуу шамалдан улам Жалал-Абад жана Ош облустарынын айрым аймактарындагы ички жолдор жабылып калып, учурда ал жакта тазалоо иштер жүрүп жатат. Бул тууралуу бүгүн Өзгөчө кырдаалдар министрлигинен кабарлашты.
Сузак районунда Кашка-Терек – Кызыл-Кыя ички чарбалык жолунун 14 чакырым аралыгы кар күрткүсүнө толуп калган. Жалал-Абад – Орток унаа жолунун 40-чакырымынан 50-чакырымына чейинки аралыгында да жол каттамы токтогон. Орток жана Кызыл-Кыя, Алчалуу айылдарында трансформатор иштен чыккандыгына жана электр чубалгылары үзүлгөндүгүнө байланыштуу жарык жок.
Ош облусунун Кара-Кулжа районунда Шаркыратма айылына баруучу ички чарбалык жолдун болжол менен 5 чакырым аралыгы карга толуп, жол жабылып калган.
Алдын ала маалыматтарга караганда, адам өмүрүнө жана ден соолугуна зыян тийген жок. (RK)
