Санкт-Петербург шаарында өтүп жаткан футбол боюнча Шериктештик кубогунун чейрек финалында Кыргызстандын 21 жашка чейинки улуттук курамасы Финляндия курамасына жеңилди. Беттеш бүгүн Бишкек убактысы боюнча саат 15:00до башталып, 1:0 эсебинде финдердин пайдасына аяктады.
Шериктештик кубогу үчүн мелдеште Кыргызстан В тайпасында ойноп, Молдова жана Латвия курамалары менен беттешип, эки оюн тең 1:1 эсебинде аяктаган. Ал эми Орусия курамасын 2:1 эсебинде утуп, беш упай менен биринчи орунду ээлеген жана плей-оффко жолдомо алган.
А тайпасында ойногон Финляндия футболчулары буга чейин Эстонияны 2:1 эсебинде уткан. Түркмөнстан менен 1:1 эсебинде тең ойногон. Беларуска 1:0 эсебинде утулуп, өз тайпасында үчүнчү орун менен чейрек финалга чыккан.
Эми Кыргызстандын жаштар курамасы 5-8-орундар үчүн ойнойт. Бул кубоктун оюндарында кыргыз футболчулары эки жолу тогузунчу, бир жолу 12-орунду ээлешкен.
16-январда башталган Шериктештик кубогунун оюндары 25-январда аяктайт. Ага 12 өлкө катышууда. (ECh)