"Аялдар сунуш күтүп отурбай, саясий партияларга өздөрүнүн талапкерлигин сунуштоого тийиш" деди вице-спикер Асия Сасыкбаева 22-апрелде болгон талкууда. Анын айтуусунда, шайлоо мыйзамдарына парламент депутаттарынын 30% аялдар түзүүгө тийиш деп өзгөртүү киргизүү демилгеси колдоо таба албады. “Парламентте 90% эркектер отурганда бул демилге өтпөйт” деди вице-спикер.
Мамлекет башчы Алмазбек Атамбаев шайлоо тууралуу мыйзамда гендерлик тең салмак сакталбаса, мыйзам долбоорун артка кайтарарын эскерткен болчу.
Кыргызстанда быйыл парламенттик шайлоо болот. Мурунку шайлоодо катышкан партияларга депутаттык тизмесинен аялдарга тиешелүү өлчөмдө орун берүү талабы коюлган болчу. Шайлоо өткөн соң, айрым саясий партиялар тизмесиндеги аялдардын депутаттык орунду бошотуусун талап кылган учурлар болгон. (ZKo)
