Кыргызстанда балдарга ата-энелер, жакындары тарабынан кордук көрсөтүлүп жатканы өкүнүчтүү. Президент Алмазбек Атамбаевдин мындай мазмундагы билдирүүсү “Балдардын үй-бүлөдөгү жашоо укугу” аттуу Улуттук форумда окулду.
Президент, коомчулукту балдардын, үй-бүлөнүн кызыкчылыгын коргоого чакырды.
“Кыргызстанда баланын укуктарын коргоо аракеттери канааттандыралык эмес. Буга соңку учурлардагы наристелерге карата жасалган зордук-зомбулуктар далил”, - деп жазылат билдирүүдө.
Үй-бүлө институту оор абалга кабылганын белгилеген Атамбаев, форум катышуучулары балдардын укугун коргоо жаатында туура жана конкреттүү чечим кабыл аларына, ал иш жүзүндө ийгиликтүү колдонуларына үмүттөнөрүн кошумчалаган.
Вице-премьер-министр Дамира Ниязалиеванын маалыматы боюнча, балдар үйүнө жана интернаттарга берилген балдардын көпчүлүгү жакыр үй-бүлөлөрдүн жана мигранттардын балдары. (AiJ/MTo)