Киев эл аралык кредиторлор менен карызды реструктуризация боюнча келишимге жетишти. Украинанын өкмөт башчысы Арсений Яценюк 27-августта билдиргенге караганда, инвесторлор карыздын 20 процентин кечүүгө макул болушту. Ошону менен 18 миллиард доллардык карыздын калган 15,5 миллиардын Киев 2027-жылга чейин төлөмөкчү. Финансы министри Наталия Яресконун айтымында, үнөмдөлгөн 20 процент социалдык төлөмдөргө жана коргонуу тармагына жумшалат. Эл аралык Валюта фондунун тескөөчү директору Кристин Лагард келишим карыз программасында көрсөтүлгөн максаттарга жооп берээрин билдирди.
