Жумгалда окуучунун өлүмүнө алып келген окуя боюнча кылмыш иш азырынча козголо элек. Бул тууралуу "Азаттыкка" Нарын облустук милициясынын маалымат катчысы Медина Султаналиева билдирди. Анын айтымында, маселе соттук-медициналык экспертизанын жыйынтыгына жараша чечилет.
Кылмышка шектүү катары да эч ким камакка алына элек.
Кечээ, 19-сентябрда Жумгалдын Көк-Ой айылында 9-класстын окуучусу Жекшенбек уулу Эркинбек мерт болгон. Милициянын версиясы боюнча, аны 11-класстын окуучусу Таалайбек уулу Жайылбек мектепке ак көйнөк кийип келбегени үчүн төшкө чаап жибергенде ошол жерден мерт кеткен.
Бирок айрым маалымат каражаттары 11-класстын окуучулары тыныгуу учурунда кенже класстардын балдарын мектептин жертөлөсүнө алып кирип, салык салганын, Жекшенбек уулу Эркинбек Таалайбек уулу Жайылбектин жүрөк тушуна катуу урган соккусунан үзүлгөнүн жазып жатышат. (MiK/RK)