Бирөөлөр койгон тузакка алданып, Сирияга барып калганын айткан өзбекстандык жаран Twitter аркылуу коомчулуктан жардам сурады. Аты-жөнүн Жалалиддин Кадыров деп тааныштырган жигит Түркия менен Сирияга чектеш жерде экенин айтып, “мени куткарып албасаңар өлтүрүп салышат” деп жазды. Ал 8-октябрь күнү Twitter тармагындагы өзбек тектүү активдүү пайдалануучуларга 11 жолу жардам сурап билдирүү жазган бойдон дайыны чыкпай калган.
Анын билдирүүлөрүндө "Москвага барып, иштейсиң" деп алып кетишкени, ортомчулар менен интернеттен таанышканы айтылат.
Сирия жана Иракта согуштук аракеттерге аралашып жүргөн өзбекстандыктардын саны 3000 чамалуу деген маалыматтар бар. (SE)
