Укук коргоо органдарынан кабарлашкандай, 19-ноябрда Бишкектин 8-кичирайонунда милициянын кенже лейтенанты Актилек Абдувалиевди аткан кылмышкерлерди издөө боюнча аймактагы ар бир үй текшерилип жатат.
Алдын-ала маалыматтарга караганда, милиция кызматкери велосипед уурдап бараткан жарандарды кармап, башка кызматкерлерди жардамга чакырган учурда кол салууга туш болгон. Кылмышка шектүү 2 жаран Абдувалиевге карата 4-5 жолу ок чыгарып, акыркысын чекеге аткан. Кылмышкерлердин огунан курман болгон Актилек Абдувалиев 27 жашта болчу.
Табылган октор Макаров үлгүсүндөгү тапанчага тийиштүү экени айтылууда. (AzK)
