Тажикстан парламентинин төмөнкү палатасынын депутаттары жаңы мамлекеттик майрам, улут лидеринин же президенттин күнүн белгилөөнү сунуштоодо. “Майрам күндөрү” тууралуу мыйзамга ушундай өзгөртүү киргизилмей болгонун “Азаттыктын” тажик кызматы кабарлайт.
Жаңы майрам үчүн президент Эмомали Рахмондун туулган күнү – 5-октябрь же ал бийликке келген 19-ноябрь тандалышы ыктымал.
Мындай майрамдар башка борборазиялык өлкөлөрдө да бар. 1-декабрь Казакстанда тунгуч президенттин күнү. Түркмөнстан 1994-жылдын 19-февралын бүткүл элдик майрам – президенттин туулган күнүн белгилеген. Бир жылдан кийин ошол кездеги президент Сапармурат Ниязов аны мамлекеттик туу күнү деп өзгөрткөн.
