Ооганстандагы тынчтык сүйлөшүүлөргө Орусия катышуусу керек деп өзбек президенти Ислам Каримов 26-апрелде Москвада Орусиянын президенти Владимир Путин менен сүйлөшүүдөн кийин билдирди. Ошол эле маалда Каримов Шанхай кызматташтык уюму Ооганстандагы саясий-аскердик тирешүүлөргө аралашпашы керек деп эсептейт. Ооганстанда өкмөт менен талиптердин тынчтык сүйлөшүүсү жалпы регион үчүн “маанилүү” деп белгиледи Каримов.
Ооганстан, Пакистан, АКШ жана Кытай "Талибан" кыймылы менен Ооганстанда тынчтык сүйлөшүүсүн баштоого аракеттенген. Бирок азырынча эч майнап чыга элек. Каримов Ооганстандагы туруксуздук региондогу башка мамлекеттерге өтүшү мүмкүн десе, Путин Орусия менен Өзбекстан эл аралык антитеррордук коалиция түзүүнү колдоорун белгилеген. Президент Каримов 26-апрелде Орусияга эки күндүк сапар менен барган. (AiT)
