Түркиянын Ван провинциясында террорчулардын жекшембиге караган түнкү кол салуусунан жабыркагандар арасында кыргыздар да бар. Бул тууралуу бүгүн "Азаттыкка" Түркиядагы этникалык кыргыздар коомунун жетекчиси Курманбек Кутлу маалымдады. Анын айтуусунда, 1 кыргыз мерт кетти:
- Соңку кырдаалга байланыштуу биздин кыргыздар да айрым бөлүктөрдө аскерлер менен кошо күзөтчүлүк кызмат өтөп жатат. Эржиш районунда күзөттө тургандар арасында 6-7 кыргыз болчу. Түнүчүндө ПКК деген террористтер тобу жардыргыч салынган машиналар менен кол салуу уюштуруп, 1 аскер менен 1 айыл күзөтчүсү каза болду.
Курманбек Кутлунун айтуусуна караганда, мындан тышкары 5 кыргыз сакчы жараат алды. Алар азыр ооруканада, алган жарааты жеңил.
Мерт болгон кыргыз күзөтчүсү Туратбек Гүрожактын жаназасы эртең, 11-июлда өтөт.
Ооганстандан көчүп барган кыргыздардын Улуу Памир айылында 3 миңдей кыргыз жашайт.
Соңку кезде Түркияда бир нече ири террордук чабуул жасалды. (RK)
