Өкмөттүн токтомуна ылайык Рио-де-Жанейродо өтүүчү жайкы Олимп оюндарында алтын медаль жеңген спортчуга 7 миллион сом сыйлык катары берилет.
Бул тууралуу “Азаттыкка” Олимп оюндарына барчу кыргызстандык машыктыруучулар делегациясынын жетекчиси Төлөсүн Ысыраилов билдирди. Жалпысынан мамлекет алдыңкы 8 спортчунун катарына киргендерге акчалай сыйлык тапшырат.
- Сыйлык маселеси өкмөттө буга чейин эле чечилген. Ага ылайык 1-орунга 7 миллион сом, 2-орунга 5 млн. сом, коло медалга 3,5 млн. сом деп бекитилген. Ошону менен катар сегизинчи орунга чейин акчалай сыйлык каралган. Алсак 8-орунду алып келген спортчуга 700 миң сом берилет. Кыргызстандын атынан Рио-де-Жанейродо өтүүчү Олимп оюндарына 19 спортчу катышат.
XXXI Олимп оюндары 5-августта башталып, 21-августта жыйынтыкталат. Спорттук мелдешке 206 өлкөдөн спортчулар катышат. (SDz)
