Армения полициясынын маалымдоосуна караганда, жарадарларга жардам берүүгө келген дарыгерлерди оппозициялык куралдуу топ барымтага алды. Полициянын маалымат катчысы Ашот Акароняндын 27-июлдагы билдиришинче, төрт дарыгер түнкү атышуудан жаракат алган эки жоочуга медициналык жардам берүүгө жөнөтүлгөн учурда барымтага алынган. Аларды бошотуу боюнча сүйлөшүү жүрүүдө.
Оппозициялык саясатчы Жирайр Сефиляндын куралдуу тарапкерлери 17-июлда Ереван полициясынын имаратына кол салып, ал жерди ээлеп алган жана бир нече полиция кызматкерин барымтага алган.
Барымтага алынгандар 23-июлда бошотулган. Бирок куралдуу адамдар полиция имаратында кала беришкен. Алар Сефилянды бошотууну жана президент Серж Саргсяндын кызматтан кетишин талап кылууда. (AiT)