Жалал-Абаддын Чаткал районунда 6-августта жүргөн селдин кесепетин жоюу иштери жүрүп жатат. Бул тууралуу Өзгөчө кырдаалдар министрлигинен кабарлашты. Маалыматка ылайык, 8-август күнү сел кесепетин жоюу жана калыбына келтирүү иштери жүрдү. Ага Өзгөчө кырдаалдар министрлигинин аймактагы бөлүмүнүн кызматкерлери, жергиликтүү тургундар катышты. Жыйынтыгында 15 турак-жайдын айланасы, 100 метр аралыкта сел каптаган сайлардын нугу тазаланды. Бул иштер улантылууда.
Ошондой эле 137 адамдын саламаттыгы текшерилип, психологиялык жардам көрсөтүлдү.
6-августта катуу жааган жамгырдан улам Чаткал районунун Терек-Сай айылында сел жүргөн. Анда 26 турак-жайдын короолорун сел каптап, төрт турак-жайдын ичине суу кирген. Мырзабаев айылында 3 жеңил унаан баткактын ичинде калган.(BkA)
