Линктер

бейшемби, 8-декабрь, 2016 Бишкек убактысы 00:50

Рио-де-Жанейродо өтүп жаткан отуз биринчи жайкы Олимп оюндарында эркин күрөш боюнча 97 килограммга чейинки cалмактагылар арасында күрөшкөн кыргызстандык балбан Магомед Мусаев чейрек финалга чыкты. Ал 1/8 беттешинде атаандашы, монголиялык спортчу Доржханд Худербугланы 9:0 эсебинде утту. Мусаевдин атаандашы 2014-жылы Азия чемпиону болгон.

Кыргыз балбаны чейрек финалда украиналык Валерий Андрийцев менен күрөшөт.

Магомед Мусаев 2011-жылдан бери эл аралык оюндарда Кыргызстандын намысын коргоп жүрөт. 2012-жылы Лондондогу Олимп оюндарында 7-орунду ээлеген. Азия чемпиону болуп, ошондой эле бул оюндардын күмүш байгесин үч жолу жеңип алган.

Рио-де-Жанейродогу Олимп оюндары аяктоодо. Расмий жабылышы бүгүн Бразилия убактысы боюнча 20.00дө, ал эми Кыргызстандын сааты менен 22-августта таңкы 5те башталат. Анда Кыргызстандын туусун Азия чемпиону, Риодогу оюндарда 5-орунду ээлеген балбан Айсулуу Тыныбекова көтөрүп чыгат.

Жалпысынан бул оюндарга кыргызстандык 19 спортчу катышты. Грек-рим күрөшүнөн Арсен Эралиев менен Айсулуу Тыныбекова бешинчи орунду ээлесе, дзюдочу Юрий Краковецкий жетинчи орунга илинди.10-августта оор атлетчи Иззат Артыков коло медаль тагынып, Кыргызстандын эсебине жалгыз байге алып кайткан эле. 18-августта Эл аралык спорттук арбитраж соту Артыковдун кызытма колдонгону аныкталды деген жүйө менен анын жеңишин жокко чыгарды. Иззат Артыков допинг колдонгон деген айыпты четке кагууда.

Азаттык Фейсбукта

пикирлерди көрсөт

XS
SM
MD
LG