Жогорку Кеңештеги башкаруучу коалиция мүмкүн болушунча кыска мөөнөттө түзүлүшү керек жана бул үчүн учурда тиешелүү аракеттер көрүлүп жатканын бүгүн "Азаттыкка" Социал-демократтар фракциясынын лидери Иса Өмүркулов билдирди. Анын айтуусунда, бүгүн "Бир Бол" жана "Кыргызстан" фракцияларынын лидерлери менен консультациялар өттү.
- Көп деле создуктурбаганга аракет кылып жатабыз. Себеби убакыт ошондой болуп жатат. Өкмөт батыраак толук кандуу ишке кириши керек. Кыш келатат. Келерки жылдын бюджети кабыл алына элек... Бат-бат эле өткөрөлү деген ой бар. Адегенде ар бир фракция менен өз-өзүнчө принциптер тууралуу сүйлөшүп алсак, андан кийинки маселелерди чечкенге оңойураак болот.
Парламенттин азыркы чакырылышы былтыр күзүндө шайланган. Ага кирген алты фракциянын төртөө (КСДП, "Кыргызстан", "Ата-Мекен" жана "Өнүгүү-Прогресс") көпчүлүк коалицияга бириккен.
Дүйшөмбү, 24-октябрда КСДП фракциясы коалициядан чыкканын жарыялап, башкаруучу көпчүлүк тарап кеткен.
26-октябрда президент Алмазбек Атамбаев жаңы коалиция куроо мандатын КСДПга тапшырган. (RK)
