24 жылдан бери чыгып келген “Заман Кыргызстан” гезитинин иши токтоду. Октябрдан тарта аталган басылма чыкпай жатат. Маалыматтарга караганда, кызматкерлер тарап, азыр редакцияда бир кабарчы жана дизайнер гана калды. Анын чоо-жайы азырынча так айтыла элек.
Аталган басылма Түркиядагы Zaman эл аралык гезитинин Кыргызстандагы бөлүмү катары 1992-жылы ишин баштаган. Медиа эксперттер аны кыргыз тилдүү гезиттер арасында бейтараптуулук сыяктуу эл аралык эрежелерди сактаган жалгыз басылма катары сыпатташып келген.
“Заман Кыргызстанда” убагында Мырза Гапаров, Сүйөркул Тургунбаев өңдүү акын-жазуучулар эмгектенишкен, учурда Абдыкерим Муратов сындуу адабиятчылар иштейт. (SE\BCh)
