“Фукусима-Дейчи” атомдук электр станциясынын жанындагы деңиз суусунда радиоактивтүү йоддун деңгээли нормадан 4385 эсеге көп. Бул жөнүндө Жапониянын Өзөктүк коопсуздук агенттиги билдирди. Агенттиктин башчысы Хидехико Нишияманын 31-марттагы маалымат жыйынында айтышынча, бул “Фукусима-Дейчи” АЭСинин реакторлорунда 11-марттагы 9 баллдык жер тербетүү жана цунамиден кийинки жардыруудан берки эң бийик деңгээл. Нишияма радиация эч кимге коркунуч туудурбаганын, анткени АЭСтен 20 чакырымдык алкакта жашаган эл коопсуз аймакка көчүрүлгөнүн кошумчалай кетти.