Линктер

бейшемби, 8-декабрь, 2016 Бишкек убактысы 14:08

"Нур Отандын" жетекчилигине дагы бир Назарбаев дайындалды


Казак президенти Нурсултан Назарбаев жаш кезинде жакындары менен түшкөн сүрөт. Биринчи катарда солдо иниси Сатыбалдынын уулу Кайрат.

Казак президенти Нурсултан Назарбаев жаш кезинде жакындары менен түшкөн сүрөт. Биринчи катарда солдо иниси Сатыбалдынын уулу Кайрат.

24-майда Казакстандын бийликтеги “Нур Отан” партиясынынын катчысы болуп президент Нурсултан Назарбаевдин иниси Кайрат Сатыбалды дайындалды. Партиянын расмий өкүлдөрү ал жаш болсо да өзүн тажрыйбалуу саясатчы катары көргөзүүгө үлгүрдү дешсе, айрым аналитиктер бул дайындоону Назарбаевге “улут көсөмү” деген статус ыйгаруу демилгеси менен байланыштырышат.

"Нур Отан" партиясынын билдирүүсүндө айтылгандай, жаңы катчыга жаштарга аскерий-патриоттук тарбия берүү, партиянын интернационалист жоокерлердин, жаштардын жана башка коомдук уюмдар менен кызматташуусуна көз баш болуу милдети жүктөлмөкчү.

1970-жылы туулган Кайрат Сатыбалды президенттин иниси маркум Сатыбалды Назарбаевдин уулу. Ал 30 жашында Астананын аким орун басарлыгына дайындалганда кеңири элге таанылган. Кийин “Казакмунай” компаниясында Коопсуздук комитетинде жетекчилик кызматтарда иштеп, 35 жашында генерал-майор наамын алган. 2005-жылы “Казакстан темир жолу” ишканасына вице-президент болуп дайындалып, бирок ал жерде да көпкө кармалган жок.

Коопсуздук комитетинде иштеп жүргөн кезинде фамилиясын Назарбаевден Сатыбалдыга алмаштырган жаш саясатчы ошондон бери көп көрүнбөй калган эле.

Анын улам бир кызматка дайындалышын, “Азаттыктын” казак кызматынын редактору Султанхан Аккул уулунун айтымында, ар кандай чечмелесе болот: "Советтер заманында калыптанган расмий эмес салт боюнча бийликтеги ар бир адам өз мураскерин түрдүү деңгээлде сынактан, тажрыйбадан өткөрөт. Экинчи жагынан Кайрат Сатыбалды Астана шаарынын акимчилигинде иштегенде аны башкалар менен тил табыша албаган, менменчил, текебер адам катары сыпатташчу. Балким, анын кызматты тез-тез алмаштырышына кол астындагылар, жетекчилер менен тил табыша албаганы себеп болушу ыктымал".

Саясат таануучу Досым Сатпаевдин пикиринде, "Нур Отандагы" жооптуу кызматка президент үй-бүлөсүнүн мүчөсү дайындалганы көптөн кабар берет: "Бул дайындоонун улут көсөмү деген демилгеге түдөн түз байланышы бар болушу мүмкүн. Башкача айтканда, белгилүү бир деңгээлде ал жобону ишке ашырууга даярдыктар жүрүп жаткансыйт. Назарбаев үй-бүлөсүнөн чыккан адамдын бул кызматка дайындалышы келечекте "Нур Отандын" кудурети күчөйт дегенди билдирсе керек".

Сатпаев ошондой эле Назарбаев президенттиктен кеткенде анын жакындары ортосунда бийлик талашуу башталышы мүмкүн деп божомолдойт.

Айта кетчү нерсе, жакында Казак парламентинин бир катар депутаттары президент Нурсултан Назарбаевге улут көсөмү деген статус берүү демилгесин көтөрүшкөн. Парламент жактырган мыйзамга ылайык, Назарбаев кызматтан кеткенден кийин да жакындары менен кошо кол тийбестик укугун сактап калмакчы. Анын мүлкү да конфискацияланбоого тийиш.

Баса, Кайрат Сатыбалдынын бир тууганы Самат Сатыбалды уулу Абиш жыл башынан бери Коопсуздук комитетинин кадрлар боюнча департаментин жетектеп келатат. Президенттин дагы бир иниси Болат Назарбаевдин баласы Нурбол Назарбаев 2007-жылы 23 жашында Капшагай шаарынын прокурору болуп дайындалган.
  • 16x9 Image

    Айнура Жекше кызы

    "Азаттыктын" Прагадагы кеңсесинин кызматкери, журналист, котормочу. Кыргыз улуттук университетинин чет тилдер факультетин аяктаган.

пикирлерди көрсөт

XS
SM
MD
LG