Линктер

шейшемби, 6-декабрь, 2016 Бишкек убактысы 22:16

Бириккен Элдик кыймылдын төрагасы Алмазбек Атамбаев 17-мартта Элдик курултайда сүйлөгөн сөзүндө Кыргызстанда эл аралык шылуундар башкарып жатат жана мамлекеттин байлыгын арзан сатып, электр акысын көбөйтүп, элди тоноп атат деп бийликти күнөөлөдү.

- Урматтуу агайын-туугандар, биринчиден, Бакир Имаров айткандай, Баткенден бери миң километр ашып келгениңерге чоң рахмат. Биз канча жолу катачылык кетирип, ишеничиңерди актабасак дагы келгениңиздерге чоң рахмат. Бизге деле кыйын болуп атат, бирок бизге демди силер берип атасыңар. Ошон үчүн бизди атып атабы, камап атабы биз сынбайбыз.

Балыкчыда билесиңер, айтып кетпедиби, керек болсо депутаттарды сабаган деп. Ошондо Кубан Кадыровду тизеге тур деп сабаган. Кубан тизеге турбай койгон, ошон үчүн сабаган. Комитетте жер-жерлерде курултайларды өткөрүп туруп элден сурайлы, мындай болуп атат, макулсуңарбы, же бийликти эл алыш керек беле.

Эгерде эл тымпыйып жатып берсе, макулбуз, тебелей берсин десе, анда макул болот. Эгерде, эл жок, Нарынга, Жалал-Абатка окшоп чыкса, жок бийликти биз кайрадан алабыз дегенге элдин конституциялык укугу бар. Кайсы жол бар деп атпайбы, мына азыр кыйкырып атат, азыр эле барабыз Акүйдү алабыз деп. Ачык айтайын шайлоо күнү деле кээ бирлер балдарды түрткөн шайлоону эмне кыласыңар, кеткиле деп, аягы кандай бүттү. 18 бала түрмөгө тыгылды, сабалды.

Ошон үчүн ушундай провокацияларга кетпейли. Бүгун кудай буюрса колдоп берсеңер, ошондо баарыбызды бириктире турган, башкара турган бир уюмду шайлайбыз, төрагасын коебуз баары сыйлай турган, урматтай турган кишини. Дагы бир нерсени эскертип коеюн, мына 2005-жылга бир жумадан кийин беш жыл болот.

2005-жылы өзүбүз эле жүргөнбүз, бирок эстесеңер, андан 2-3 ай мурун Жалал-Абат эли айткан жок бизге мындай бийликтин Акаевдин кереги жок деп. Анан кийин Ош, анан кийин Кочкор, анан кийин Нарын айткан, эң аягында Бишкек ойгонгон. Бишкек башында ойгонот деп ойлобогула. Эгерде бул жактан бирөө сүйрөп барып, Акүйдү алып коебуз дегендерди эрчигендер 18 баладай болот. Алар ээрчитип барып качып кетти, ошол эле СНБнын балдары экен.

Биз жүрдүк сотторго тебеленди болуп Азимбек менен. Ошондуктан бул жолу бардыгын план менен жасайбыз, бирок мындан ары курултайларда буюрса чечимди бүгүн алабыз. Мындан башка чечим жок. Эл бийликти колуна алыш керек. Конституция боюнча эл бийликтин жалгыз булагы.

Кыргызстанды көрүп атасыңар кимдер башкарып атат, международный аферисттер башкарып атат. Жакында мен Орусия, Түркияга барып келдим. «Ван электрик» деген сетти сатыптыр. «Ван электриги» «Балыкчы электрикке» тең. 100 млн. долларга сатылды. «Улудак электрик» 940 млн. долларга сатылды, бир миллиардга. Бишкектен төрт эсе кичинекей. Бизде 3 млн. долларга сатып туруп, анан ремонтко акча жок деп атат. Элди тоноп атат.

Мүмкүн пенсионерлер ишенип атат. Азыр бийлик айтып атпайбы, электр кубатынын өздүк наркы жогору деп. Мисалы, Казакстанда 2 сом, а бизде болгону 70 тыйын деп. Казакстанда электр кубатын газ менен көмүр иштеп чыгат. Россияда дагы 99 пайыз ушундай. А бизде 90 пайыз кудай берген суунун эсебинен иштелип чыгат. Бизде анын өздүк наркы 8 тыйын.

Мына базарда 8 сомдук нерсени 16 сомго сатат, 80 сомго сатпайт. Бизде 8 сомдук электр энергияны 80 тыйынга сатып ыраазы болбой, бир жарым сомдон сатып атат. Мунун баары элди тоноп аткандар. Жанагы Гуревич-муревичтер баары келип туруп элибизди, жерибизди тоноп атат. Элибиз карап турбай буюрса чыгабыз. Анткени бийлик элдики болуш керек.

Дагы бир нерсе айтайын, бул бийлик азыр ойлоп атат, биз коркутсак, сабасак сынып берет деп. Андай болбойт. Сабасын, атсын, камасын, биз аягына чейин барабыз. Бул биздин жерибиз. Бул Гуревичтердин, же Максим-саксимдердин жери эмес, бул биздин жер.

Бирок бир нерсе суранат элем сиздерден, биз дагы балалык кылып шайлоого барабыз деп элдин шагын сындырып алдык. Анткени көрүнгөндөргө ишендик. Азыр мен айтаар элем, мына баарыбыз тең бүгүн шайлаган уюштуруучу органга баш ийип туруп, көп нерсени мүмкүн ал орган айта албайт, ошол иш менен кетели.

Бул ишти кудай буюрса бүтүрөлү. Колдон келсе Азимбек айткандай бүтөбү, кийинчерээк бүтөбү, бирок эл чечсин Конституциянын негизинде. Жашасын элибиз, Кыргызстаныбыз, биз жеңебиз.

пикирлерди көрсөт

XS
SM
MD
LG