Линктер

жума, 9-декабрь, 2016 Бишкек убактысы 05:58

Бүгүнкү күнгө чейин Ошто өзбек улутундагы 637, ал эми кыргыз улутундагы 432 адам алмашылуу жолу менен барымтадан бошотулду. Оштогу бүгүнкү абал тууралуу аймактагы кабарчыбыз Алишер Токсонбаев маалымат берди.

- Ушул тапта Ош шаарында кырдаал кандай?

- Ош шаарынын комендантынын айтуусуна караганда, кырдаал дээрлик турукташып калды десек болот. Биз азыр комендант Курсан Асановдун тобуна кошулуп, шаарларды кыдырып жүрөбүз. Учурда көчөлөрдөгү жол тосмолорду тазалоо иштери жүргүзүлүүдө. Жергиликтүү бийликтин өкүлдөрү, ошондой эле шаардын коменданты баш болуп, шаардын тургундары менен жолугуп, айрыкча Шейит-Дөбө, Калинин көчөсүндөгү тосмолорду жок кылуу аракеттерин көрүп жатышат.

- Бүгүн күч органдары көчөлөрдө коюлган тосмолорду саат онго чейин ачпаса, ондон кийин атайын операциясын баштайбыз деди эле. Бул маселе кандай болуп атат?

- Кечээ жергиликтүү бийлик ошентип жарыялаган. Бирок шаардын комендантынын билдирүүсүнө караганда, жергиликтүү калк мындай талаптарга баш ийбей жатат. Ошондуктан алар менен азырынча сүйлөшүү жолу аркылуу маселени чечүүгө шаардын коменданты өзү баштап кийлигишип атат.

- Барымтада бир топ атуулдар бар деген маалымат чыкты эле. Мындан кабар алдыңызбы?

- Азыр эле Ош шаарынын коменданты Курсан Асановдун «Азаттыкка» маалымдашынча, эки тарапта тең адамдарды барымтага кармоо жүрүүдө. Ушул учурдагы маалыматка караганда, өзбек улутундагы 637, ал эми кыргыз улутундагы 432 адам алмашылуу жолу менен барымтадан бошотулду. Мындан тышкары коменданттын айтымында, 322 өзбек улутундагы адам кыргыз тараптардын барымтасынан бошотулду.

- Каза болгондордун сөөгүн берүү маселеси көтөрүлдү эле?

- Каза болгондордун сөөгүн берүү боюнча азырынча жолугушуулар учурунда сөз жүрө элек. Бирок бизге жеткен маалыматтар боюнча, ошол маселени өзбек тараптан да, кыргыз тараптан да кечетен бери коюп келатышат. Атүгүл тирүүлөрдү да, сөөктөрдү алмаштыруу боюнча кечээ Убактылуу өкмөттүн төрайымы Роза Отунбаева Ошко келгенде да сөз болгон. Бирок аларга бийлик тарабынан азырынча так жооп айтыла элек.

- Гуманитардык жардамдарды бөлүштүрүү маселеси бир ыкка коюлдубу?

- Убактылуу өкмөттүн атайын өкүлү Айгүл Рыскулованын айтымында, эки күндөн бери гумжардамды таратуу маселеси дээрлик нукка түшүп калды десек болот. Бирок ошол эле учурда жергиликтүү тургундар тарабынан нааразычылыктар көп. Анткени гуманитардык жардамдарды көбүнчө аймактык кеңештердин төрагалары эле алып кетишүүдө, бирок ал жерде тизмелери так эмес, кимге таратканы белгисиз болуп атат.

пикирлерди көрсөт

XS
SM
MD
LG