Линктер

logo-print
шейшемби, 6-декабрь, 2016 Бишкек убактысы 09:14

Жабылган университет, жалдыраган студенттер

  • Ырысбай Абдыраимов

Жалал-Абаддагы "Эл Достугу" университетинин июндагы тополоң учурунда өрттөнүп талкаланган терезелери ошол бойдон турат

Жалал-Абаддагы "Эл Достугу" университетинин июндагы тополоң учурунда өрттөнүп талкаланган терезелери ошол бойдон турат

Билим берүү министрлиги жапкан Жалал-Абаддагы “Эл достугу” университетинин студенттери окуусун кайда барып улантаарын билбей, баштары маң.

Каражаты аз ата-энелер балдарын Бишкекке же Ошко которуп окутаарын чече албай, аталган университетти кайра ачууну талап кылышууда.

Ушу тапта Жалал-Абаддагы “Элдердин Достугу“ университетинин студенттери менен окутуучуларынын тагдыры арабөк болуп турат. Анткени, аталган окуу жай Билим берүү министрлигинин чечими менен окуу-материалдык базасы лицензиялык талаптарга жооп бербейт деген негизде жабылып, анда окуган бир жарым миңдей студент менен окутуучулар эми кайда барып, жайгашаарын билбей, беймаза.

19- августта жүздөй студент менен алардын ата-энелери башка окуу жайларга которулууга керектүү кагаз-документ алуу максатында университетте топтолушту. Алардын көпчүлүгү медициналык факультеттин студенттери болуп чыкты. Ата-энелердин бири Ырыскан Атабекованын медфактын экинчи курсун аяктаган уулун Бишкекке которуп, окутууга мүмкүнчүлүгү жок. Университетти кайра ачууну өтүнгөн бөлөк энелер өңдүү ал да окуу жайдын жабылышына нааразы болду:

- Кайсы жакка алып барып окутушубузду билбей башыбыз катып турган чагыбыз. Биз суранат элек, жакынырак жерге балдарыбызды которуп берүү жагын. Балдарыбыз кыйналып жүрүшөт, бир айдан бери сарсана болуп жүрүшөт, кайсы жакка барышты билишпей. Бишкекке, Ошко барганга кудуретибиз жетпейт.

Университеттин окутуучусу бир күндө 30 гана студенттин академиялык аныктамасын толтурууга үлгүрөөрүн айтып, калгандарды куру бекер күтпөөгө чакырып, дароо көздөн кайым болду. Окуу жайдын жабылыш себебин түшүндүрүүдөн ректор Азат Караматов караманча баш тартты. Аныктамасы жок бөлөк окуу жайга кантип которулууну билбей, убакыттын өткөнүнө санаа тарткан студенттер толтура. Гүлноранын эсебинде окуу жайды жабууга негиз жок эле:

- Академиялык справка бериш керек. Башка жогорку окуу жайларга киргенче бекип калат. Бизге тезирээк бресе, биз башка университеттерге барып жайгашалы. Эмне кылышыбызды билбейбиз. Жүз элүүдөй студентке уруксат деген экен.

Талабы жана билим беүүсү күчтүү Бишкек менен Оштогу окуу жайларга караганда “Элдердин Достугу” университетинин келишим акылары төмөн жана коррупция жок болчу деген пикирди бул жерде чогулган ата-энелерден уктук. Уулу медфакттын 5- курсуна өткөн Наргиза өткөн окуяларга студенттердин тиешеси жоктугун айтат:

- Бир тыйын бербей ушуга өтүшкөн. Корруциясы жок Кыргызстанда жалгыз университет ушул болчу мен билгенден. Анткени менин балдарым Бишкекте, Ошто окушкан, билем. Клиникасы бүтүп, ординатураны ушул жерге өтөгөнгө мүмкүнчүлүк алганда ушундай кырсык болуп жаап коюшту. Студенттердин күнөөсү эмнеде. Ушуну калыбына келтирип берсе жакшы болот эле. Эки элди элдештире турган, эки элдин кызыкчылыгын көздөп ушул жерди кайра ордуна коюп койсо биздин жашоо мындан да оңолот эле.

Бирок окуу жайда окутуунун сапаты начар, талабы катуу эмес деп айткандар да болду. Чет тилдер филологиясы факультетинен Ислам Ханалиев менен Гүлназ Исакова окуусун кайда улантаарын билбейт:

- Филология факультетинин үчүнчү курсунда окучумун. Эми кайда барыбызды билбейбиз.

Аныктамалардын кечиктирилишине атайын кагаз-формулярдын (анкета дешет экен) жетишсиздиги себеп. Көп студенттер бөлөк окуу жайларга баргысы келбей, үйлөрүндө жатышат. Окуу жайдын материалдык-техникалык базасы жакшы, электрондук китепканалар ачылган, окутуучу- профессордук курам да жетиштүү. Эми 200дөй мугалим да ишсиз калуусу ыктымал.

- Ушунча студент окушчу. Азыр башка Бишкекке, Ошко жогорку окуу жайларга барса алар контракт төлөшү керек. Көп студенттер кеткиси келбей атат, сарсана болуп жүрүшөт. Академ справка берели десек бланк жок,- дейт аталган университеттин окутуучусу Феруза Бурханова.

Медицина факультетинин студенттери Бишкектеги медицина академиясы менен кыргыз – славян университетине которулууну каалашкандыгын вице- премьер У. Абдуллаева менен жолугушканда өздөрү билдиришкен. Калган студенттер башка (Жалал- Абад жана Оштогу) окуу жайларда билимин улантат. Ал окуу жайларга “Элдердин Достугу” университетинин окуучуларынын тизмелери жиберилет. Академиялык аныктаманын жазылышына тынчсыздануунун кереги жок, ал чечиле турган маселе. Губернатордун 1- орунбасары Жумагүл Эгембердиеванын пикирине караганда, министрликтин талабын аткарбаган окуу жайда каржылык маселе да бар, анткени мугалимдер май айынан берки айлыктарын ала албай калышкан, жеке менчик окуу жайды мамлекет каржылабайт:

- Калган факультеттин студенттери каалагандары Жалал-Абаддагы мамлекеттик университетте, каалагандары ОшГУ, каалагандары Бишкектеги жогорку окуу жайларга которула турган болду. Студенттери кеч калып атат, документтери үлгүрбөй атат деп айтылып атат. Бул маселелер эске алынат. Жогорку окуу жайларга тизмелери барат. Эмне үчүн жабылып атат? Бул менчик университет болгондон кийин мага азыр мугалимдер деле келип атат, май айыныны айлыгын алган жок, менчик ээси жок болгондон кийин мамлекет буларды каржылабайт. Сентябрдан баштап окууну калтырганда деле айлыксыз ким иштейт?

Университеттин имараты оңдолбой, өрттөлгөн терезелери талкаланган калыбында турат.
  • 16x9 Image

    Ырысбай Абдыраимов

    "Азаттыктын" Жалал Абад облусундагы кабарчысы, Кыргыз мамлекеттик университеттин журналистика бөлүмүн аяктаган.

пикирлерди көрсөт

XS
SM
MD
LG