Линктер

ишемби, 10-декабрь, 2016 Бишкек убактысы 05:40

Кыргыз акындары Бакуда ыр окушту


Акындар Кыялбек Урмамбетов менен Алтынбек Исмаилов Азербайжандын борбору Бакуда өткөн дүйнөлүк түрк тилдүү акындардын эл аралык сегизинчи ыр майрамына катышып келишти.

Дүйнөлүк түрк тилдүү акындардын эл аралык ыр майрамдары кай жерде өтпөсүн 1992-жылдан бери Түркия мамлекети тарабынан каржыланып келатат. Анткени бул дүйнөлүк поэзия кечеси 1992-жылы Түркия мамлекети тарабынан уюшулуп, алгач Түркиянын Бурса деген шаарынан башталган болчу.

Белгилүү акын, Кыргыз маданиятына эмгек сиңирген ишмер Кыялбек Урмамбетов Бакуда “Өмүрзар” аттуу ырын окуган:

-Көз жетпейт көр дүйнөнүн тереңине,
Сөз жетпейт кайрымы жок кереңине,
Күмүштөй күндөрүмдү күүп алып,
Үлүштөй кайра мага берери не...

Жашайбыз бала күтүп, кайрым тилеп,
Жашайбыз жаралгандан кайгы-муң жеп,
Жан барда арман жоктой гүлдөйлүчү,
Жашайбыз дагы канча ай ким билет...

Түркия мамлекети уюштуруп келаткан поэзия кечеси ар эки жылда бир өтүп, буга чейин Түркияда, Түркмөнстанда, Казакстанда, Крымда, Кипрде, Македонияда жана Францияда өтүп келген.

Акын Кыялбек Урмамбетов Бакуга болгон чыгармачылык сапарында кыргыз тили, анын келечеги тууралуу ой-санааларга батканын айтат:

- Кыргызстан менен Азербайжанды салыштыра карап, аларда таптакыр жарык өчпөгөнүн билдик. Анан өз эне тилинен жанбай сүйлөшөт экен. Кыскасы алар өз эне тилинин патриоттору экенин көрдүм. Кыргызстанга барганда булардын патриоттуулугун айтам, мен да элимди, өзгөчө жаштарды кыргыз тилин сактоого чакырам деп, өтө толкунданып аэропорттон түшүп, “Манас” аба майданындагы кыргыз кызматкерлерге кыргызча сүйлөсөм, орусча жооп кайтарып зээнимди кейитишти. Ичим күйүп калды...

Бакуда өткөн эл аралык сегизинчи поэзия фестивалы бир чети соңку жылдарда уланып келаткан ыр майрамдарын уласа, бир чети өткөн жылы 85 жаш курагында дүйнөдөн өткөн азербайжан акыны Бахтияр Вахабзаденин жаркын элесине арналды. Кыялбек Урмамбетов менен чогуу барган жаш акын Алтынбек Исмаилов Бакуда өткөн ыр майрамда кыргыз тилинде ырларын окушканын кубануу менен белгиледи:

- Биз Бакуда кадимкидей, Кыргызстандагыдай күпүлдөп кып-кыргызча ыр окудук. Тилди жакшы түшүнө беришпейт го дегенибиз менен, дил жеткирип турат экен. Көпчүлүк түрк тилдүү акындар ырларын кагаз карап, образга киралбай окуп атышса, Орто Азиядан барган акындар , айрыкча биз Кыргызстандан баргандар ырдын ички маңызына бериле, анан жатка окусак, абдан таң калышты.

Ооба, Каспий деңизинин жээгинде ар кайсы өлкөлөрдөн барган 100 дөн ашык акын өз тилдеринде ыр окушкан. Бакуда окуган ырларынан “Азаттыктын” угармандарына жаш акын Алтынбек Исмаилов да үзүндү окуп берди:

-Удургуп түркүн ойлор каптайт улам,
Ушундай кең ааламга батпай турам,
Жанымды камыр кылып ийлесем да,
Жарыктык, мен өзүмдү таппай турам.

**** ****

Издебедим бак-таалайды базардан,
Издебедим ыйык жайдан, мазардан,
Көкүрөктү кир сезимден арылтып,
Кандай бакыт, көз ирмемге тазарган.

Кечээ жакында кыргыз акындары Кыялбек Урмамбетов менен Алтынбек Исмаилов катышып келген Бакуда өткөн түрк тилдүү тектеш элдердин эл аралык поэзия кечеси дагы уланып, 2011-жылы Косоводо өтмөкчү.
XS
SM
MD
LG