Линктер

жума, 9-декабрь, 2016 Бишкек убактысы 06:00

Бин Ладендин бала-чакасы Ирандан табылды


Усама бин Ладендин дареги 2001 -жылдын соңунан бери табылбай келүүдө.

Усама бин Ладендин дареги 2001 -жылдын соңунан бери табылбай келүүдө.

Иран Усама бин Ладендин кызы Сауд Аравиянын Тегерандагы элчилигинде турганын жана өлкөдөн кетүүгө уруксат сурап жатканын ырастады. “Ал-Кайида” лидеринин үй-бүлө мүчөлөрү Ирандын аймагында жашайт деген маалыматтарды расмий Тегеран буга чейин такай төгүндөп келген эле.

“Ал-Кайида” терррорчул тармагынын лидеринин (анын ысымын Осама бен Ладен деп да жазышат) бала-чакасы Иранда жашаары тууралуу адегенде ушул шаршемби күнкү (23-декабрдагы) сандарында Британияда чыгуучу гезиттер кабарлашкан эле. “The Times” басылмасынын маалыматы боюнча Усама бин Ладендин жакын туугандары, атап айтканда, анын аялдарынын бири, алты баласы жана он бир небереси соңку сегиз жылдан бери Тегерандын чет жакасында, катуу кайтарылган жайда өмүр өткөрүп келген.
Бир туугандары Ирандан үн катканы тууралуу адегенде бин Ладендин улуу балдарынын бири Омар айтып чыкты.


Омар бин Ладен эмне дейт?

Усама бин Ладендин улуу балдарынын бири Омар бин Ладен “The Times” басылмасына Иман ысымдуу 17 жаштагы карындашы сакчылардан качып чыкканга жетишкен соң Сауд Аравиянын Тегерандагы элчилигине келип, ноябрь айында телефон чалганга чейин бир туугандары, алардын өлүү-тирүүсү жөнүндө эч нерсе билбегенин айткан.

Омардын сөздөрүнө караганда, Ирандан табылган туугандары ага Иран чек арасына 2001-жылдын 11-сентябрында, АКШда жасалган террордук чабуулдардын алдында келишкенин айтышкан. Төрт эркек жана эки кыз бир тууганы ал жерде жашоосун кадимкидей эле өткөрүшкөн, бирок кээде гана дүкөнгө барышпаса, дубал менен курчалган жайдан өз коопсуздуктары үчүн чыгарылган эмес.

Тегеран бул маалыматтын аныктыгын мойнуна алды

Расмий Тегеран бин Ладендин бала-чакасы Ирандын аймагында жашайт деген маалыматтарды буга чейин такай төгүндөп келген эле.

Эми Иран тышкы иштер министри Манучер Мотакки бин Ладендин кыздарынын бири Саудиянын Тегерандагы элчилигинде турганын британ гезитине чыккан макаладан кийин ырастап олтурат.

Мотаккинин бейшемби күнү (24-декабрда) сыналгыда айткан сөздөрүнө караганда, Саудиянын элчилиги аларга ушундай кабарды бир аз мурда берген.

Элчиликте баш калкалап отурган айым чын эле бин Ладендин кызы экендиги же ага тийешеси жоктугу Иран тарап үчүн анык эмес, дегеле ал Саудиянын элчилигине, ага чейин Ирандын аймагына кантип киргени белгисиз.

“Ким экендиги такталган соң, ал Ирандан кетүүсү үчүн талаптагыдай уруксат алат”, - деди Манучер Мотакки.

Бирок Иран тышкы иштер министри “ал-Каида” лидеринин Иранда жашаган башка туугандары жөнүндө айткан жок.

Сауд Арабстандын өкүлүнүн маалыматы

Ал эми Сауд Аравиянын Тегерандагы ыйгарым укуктуу өкүлү Лондондо араб тилинде чыгуучу “Аш-шарк ал-Авсат” басылмасына Иман бин Ладен элчиликтин коногу экенин жана Ирандан кетүүнү көздөп жатканын маалымдаган.

Британдык “The Times” гезитине бир туугандары Ирандан табылганы тууралуу кабарлаган Омар бин Ладен өзү Катар өлкөсүндө жашайт.

Анын айтымында, энеси, бир бир тууганы жана эки карындашы Сирияда турушат. Ал иран бийликтери туугандарына өлкөдөн кетүүгө уруксат берет деген үмүттө экенин да айтты.

Бир нече аялы жана он тогуз баласы бар делип жүргөн бин Ладен жогорудагы маалыматтарга караганда, кеминде бир аялын жана бир нече баласын 1990-жылдардын соңунда Ооганстанга алып баргандай.

Ийне жоголду, Усама бин Ладен жоголду...

“Ал-Кайида” лидеринин өзүнүн дайын-дареги болсо 2001-жылдын соңунан бери чыкпай келүүдө.

АКШ жана ооган күчтөрү анда Ооганстандагы Тора Бора тоолорунда жүргүзүлгөн аскердик өнөктүк учурунда аны кармай албай калышкан. Усама бин Ладен ошондон бери Ооганстан менен Пакистан чектешкен тоолуу аймактарда жашырынып жүрөт деп эсептелинет. Бирок табыла элек.

Анын 1967-жылы каза болгон атасы Мохаммад кезинде “Бин Ладен Груп” деген курулуш компаниясын уюштурган.

Бир туугандар саны 50дөн ашкан бин Ладендер үй-бүлөсү Сауд Арабстандагы эң бай кландардын бири деп саналат.

Усама бин Ладен өзү Саудиянын жарандыгынан 1994-жылы эле кол жууган. Буга анын террорчул-согушчул аракеттери жана үй-бүлөсү андан баш тарткандыгы себеп болгон.
  • 16x9 Image

    Улан Алымкул уулу Эшматов

    "Азаттыктын" Прагадагы кеңсесинин кызматкери, журналист, саясат жана экономика тармактары боюнча адис. Кыргыз улуттук университетинин журналистика факультетин аяктаган.

пикирлерди көрсөт

XS
SM
MD
LG