Линктер

жекшемби, 11-декабрь, 2016 Бишкек убактысы 14:00

Чолпон-Атада өтчү "Көчмөндөр оюндарынын" бюджети боюнча чыр чыкты. Интернет басылмалардын бири оюнду уюштурууга кеткен чыгымдардын сметасын жарыялады.

Интернетке жарыяланган эсеп-кысап көрсөтүлгөн чыгым үч миллион АКШ долларынан ашкан. Уюштуруу тобу жарыяланган маалыматты төгүндөгөнү менен чыгымдын так санын ачык айтышкан жок.

Сметадагы суммага оюндар өтчү стадионду кайра курууга бөлүнгөн чыгым кирген эмес. Анда болгону уюштуруу иштери, ролик тартуу, кеңсе ижарасы, уюштуруучулардын айлык-маянасы, интернет сайт ачуу сыяктуу иштерге кеткен чыгымдар үч миллион доллардан ашкан.

"20 миң эмес, төрт миң доллар..."

Айрыкча ал эсеп-кысап көрсөтүлгөн "Көчмөндөр оюнунун" интернет сайтын түзүүгө 20 миң доллар кеткен деген суммадан көпчүлүк шек санап турат. Сайтты жасаган TLN Company компаниясынын башчысы менен байланышууга мүмкүн болбоду.

Бирок компьютер боюнча адис Искендер Асаналиевдин айтымында, сайт ачуу мынчалык деле кымбат турбайт экен:

- Сайттын программалык жабдылышына жараша сумма чыгат. Ашып кетсе 1,5 миң доллар кетет. Эгерде WordPress менен жасаса анда 500 доллар эле болот.

"Көчмөндөр оюнун" уюштуруу тобунун башчысы Руслан Бекболотов болсо интернетте жарыяланган каражаттын эсеп-кысабы чындыкка коошпой турганын айтууда. Ал эми иш-чаранын сайты төрт миң долларга гана жасалган дейт:

- Интернетке чыккан смета толугу менен жалган. Сайт түзүүгө биз төрт миң доллар бергенбиз. Анан айлык, кеңсенин ижарасына деп жазыптыр, анын баарына бир тыйын жумшалган жок.

Бекболотов чыгымдардын так саны азыркыга чейин айтылбай жатканынын себебин мындайча түшүндүрдү:

- "Көчмөндөр оюну" башталаар алдында маалымат бергени жатабыз. Кайсы акча кайда кетти ошондо маалымдайбыз. Бюджеттен канча алдык, демөөрчүлөрдөн канча түштү баары дайын болот.

Кыйылган бактын күйүтү

Буга чейин өткөн кылымдын отузунчу жылдары тигилген Бостеридеги Леонид Раппопорт атындагы аллеядагы дарактардын кыйылып жатканы коомчулукта нааразылык жараткан эле.

- Мен бир ай мурун эле барып келгем. Ал жерде бак-дарактар жап-жашыл болуп жакшынакай эле өсүп турган. Куурап калгандарды кыйып жатабыз деген карандай калп. Бул жапайычылык мамиле. Жүз жыл мурда тигилген бул теректер Чолпон-Ата шаарынын символу болуп калган, - деди активист Назира Асанкадырова.

Жергиликтүү бийлик аллея ордуна “Көчмөндөр оюнуна” ылайыкталган автоунаа токтоочу жай куруларын, куурап калган гана дарактарды кыйып жатканын айтышкан. Жалпы жонунан эки жүзгө чукул бак-дарактын орду бошотулган.

Бирок 2-сентябрда вице-премьер-министр Элвира Сариева Раппопорт атындагы аллеядагы бактарды кыюуну токтотуу боюнча өкмөттүн Ысык-Көл облусундагы өкүлү Эмилбек Каптагаевге тапшырма берди. Бул тууралуу өкмөттүн маалымат кызматынан кабарлашты. Сариева аталган аллея Ысык-Көл үчүн экологиялык, туристтик чоң байлык экенин айтып, бактарды кыюу туура эмес экенин белгилеген.

Социалдык тармактарда бак-дарактарды кыюуга каршы чыккандарды өкмөттүн Ысык-Көл облусундагы өкүлү Эмилбек Каптагаев “акмактар” деп атаганга үлгүргөн эле.

Бекер тамакка байланышкан чуу

Ал ортодо туризм департаментинин айрым ресторан ээлерине эки ай оюндун уюштуруучуларын бекер тамак менен камсыз кылуу тууралуу каты да ачыкка чыгып кетти.

Кайрылууну жазган Маданият, маалымат жана туризм министрлигинин алдындагы туризм департаментинин башчысы Максат Чакиев кызматташуу иретинде бардык эле тармактарга кайрылуу жазылганын айтууда. Чакиев "Көчмөндөр оюндарын" уюштуруу иштериндеги ар кандай кептерди бут тосуу катары баалады:

Максат Чакиев.

Максат Чакиев.

- Ресторан ээлерин өнөктөш катары чакырганбыз. Биздин ишке өнөктөш болгула, биз силерди жарнамалап беребиз деп. Бирок бир дагы ресторандан жооп келген жок. Кечээги маалымат таратып жатышкандар чоң деңгээлдеги оюндарды өткөрүүнү каалабагандар. Артында кимдер турат билбейм.

800 орундук ат майдан “Көчмөндөр оюнуна” карата жети миң киши бата турган болуп кеңейтилүүдө, курулуш иштери үчүн бюджеттен 72 миллион сом бөлүнгөн. Аталган курулуштун иштери дагы жай жүрүп жатканы буга чейин айтылган эле.

“Көчмөндөр оюну” деп аталган түрк элдеринин улуттук ат оюндары 9-14-сентябрда Ысык-Көл жээгинде өтөт. Ага 12 мамлекеттен миңге жакын конок келери айтылууда.

Буга чейин "Көчмөндөр оюну" өтчү ат майдандын курулушу жай жүрүп жатканы айтылган.

  • 16x9 Image

    Токтосун Шамбетов

    "Азаттык+" телепрограммасынын алып баруучусу. 2012-жылдан тарта "Азаттыктын» Нарын облусундагы кабарчысы болуп иштеген. Нарын мамлекеттик университетинин техникалык факультетин аяктаган. "Мыкты жаш журналист 2013" наамынын ээси. Твиттерде: @Tokojan  

пикирлерди көрсөт

XS
SM
MD
LG