Линктер

жекшемби, 11-декабрь, 2016 Бишкек убактысы 10:27
(Студент уулуна жазган апанын каты)

"Саламатсыңбы, садагаң болоюн эркетайым! Кыйналбай, жакшы окуп жүрөсүңбү?

Сагындым эрке-талтаң мүнөзүңдү. Таңда-кеч санаа чегем, каралдым, ойлоп-ойлоп бир өзүңдү.

Садагам, көзүмдөгү карегимсиң, эл үчүн арнап берген белегимсиң, илимпоз, аалым болчу, ишенген жөлөгүмсүң.

Шириндик алсам да, бекитем өзүң үчүн атап алып. Тамагыман бир кашык оокат өтпөй, отурам сен жакшы көргөн тамакты жасап алып. Коңшулар кирип калса, узатам бир сен үчүн бата алып. Окууга өткөнүңө кубанып жашып жүрөм. Студент уулум бар деп, айылда сыймыктанып басып жүрөм. Майда-барат акча ашса, жарыгым маршурткага төлөсүн деп, кемселимдин чөнтөгүнө катып жүрөм.

Каралдым, сабагым деп, көп түйшүк басты бекен, таң эрте үлгүрө албай, курсагың ачты бекен? Үнөмдөп жүрө бербей, же уулум, тартынбай ашты кенен. Жанымда болсоң кана, аттиң ай, алыс турам, өзүңө керек бирдик, сен чалба, мен өзүм телефон чалып турам.

Дандырга аппак нан жаап, таксиден жума сайын салып турам. Жылуубу жатакана, бөлмөнүн тийди бекен кеңирээги? Канчооңор жашайсыңар, достордун жакшы го ээ көбүрөөгү? Кем калба досторуңан, күн жылыса өткөрүп берейин шеринеңди.

Өткөндө коңшу кыз үйгө келет: “Уулуңузду кафеден, парктан көрдүм”, – деп күймөлөнөт. Ишенбедим, кафеге кардың ачып кирсең керек, паркта эмес, ал парктын ичинде го, китепканада жүрсөң керек.

Жарыгым, жаман жолдон качкандырсың, жакшы дос, жакшы чөйрө тапкандырсың. Билем, уулум, жашыңда дилгир элең, жакшы окуп жаткандырсың. Каникул качан болот, күтүп жүрөм, кадыресе акылдуу сөзүңдү угайын деп. Койбостон конокко да сактап жүрөм, бир карын сары майды сен келгенде бузайын” – деп апаң, сагынган убайым жеп.

Эй, студент, апакең ойлогондой жакшы окуп жүрөсүңбү?

Улукбек Омокеев

пикирлерди көрсөт

XS
SM
MD
LG