Линктер

бейшемби, 8-декабрь, 2016 Бишкек убактысы 13:49

Түштүк Кореядан келген Ли Вон Жуң Нарында беш жылдан бери студенттерге корей тилин үйрөтүп келет. Кореядан келген мугалим Нарындын суугуна жана тамагына көндүбү?

69 жаштагы Ли Вон Жуң 2006-жылы Түштүк Кореянын Сеул шаарынан корей тилин үйрөтүү үчүн Нарынга келген. Ал Кореяда маалыматтык технология багытындагы компанияны жетектеп турган эле.

Пенсияга чыккандан кийин Ли Вон Жуң корей тилин үйрөтүү курсун окуп, Кыргызстанга келген. “Корей тилин үйрөнүү оңой” дейт Ли Вон Жуң:

- Негизи корей тили менен кыргыз тилинин грамматикасы окшош. Батыш өлкөлөрүнүн тилдерине караганда чыгыш тилдери, өзгөчө корей тили жеңил. Менин студенттерим жакшы окуйт. Тилди өздөштүрүп, Кореяга барып келген студенттер бар. Азыр дагы бир студент Кореяда окуп жатат.

Нарын мамлекеттик университетинин студенти Самарбек кызы Венера төрт жылдан бери корей тилин өздөштүрүүдө. Сабактан сырткары агайдын жубайы Ким Жуң Жа пайдалуу кеңештерди көп берээрин белгиледи:

- Корей адамдарынын өзгөчөлүгү – алар сыйлуу келишет. Мисалы, адамдар бири-бирин тааныбаса да учурашып турушат жана боорукер келишет. Агайдын үйүнө барып, Кореянын ар кандай улуттук тамактарын жасаганды үйрөнөбүз. Агайдын аялы кыздар кандай кийиниш керек, кандай жүрүш керек, кантип сүйлөш керек, бактылуу болуш үчүн келечекке кандай пландарды коюш керек – мына ушулар боюнча кеңеш берип турат.

Ли Вон Жуң кыргыздын тамактарына көнө баштаганын жана корей ашканасы менен кыргыз ашканасынын окшоштуктарын айтып өттү:

- Боорсок, нан алып жейбиз. Бирок негизинен корейдин күрүчүн жейбиз. Үйдөн корей тамактарын жасайбыз. Аялыма болсо тандыр нан, самсы, беш бармак, куурдак жагат. Быжыны жеп көрдүк, абдан даамдуу. Кореяда сунде деген тамакка окшош экен. Ичегиге ар түрдүү азык салып жасайбыз, даамы бир аз башкача.

Үч бала, 7 неберелүү бул үй-бүлө алгачкы жылдары кышкысын жылуу жактарга кетип турушса, азыр болсо Нарындын суугуна көнүп калышты:

- Беш жыл болгондуктан анча-мынча суукка көндүм. Бирок аябай суук. Үй ичинде жылуулук менен чыдайбыз. Сыртка чыкканда шамал болбосо жакшы. Эми Нарындын суугуна көндүм.

“Саламаттыгым дурус болуп турса, Нарында көп жылдар бою корей тилин жана маданиятын үйрөтө берем” деген Ли Вон Жуң агайга бекем ден соолук каалап өтөлү.

пикирлерди көрсөт

XS
SM
MD
LG