Линктер

logo-print
жекшемби, 04-декабрь, 2016 Бишкек убактысы 14:24

28-октябрда Жогорку Кеңештин 6-чакырылышынын депутаттары мандаттарын алып, биринчи отурумун өткөрдү жана фракция башчыларын шайлады.

Жаңы чакырылыштын алгачкы отуруму мыйзамга ылайык мамлекеттик гимн менен ачылды. Жыйында төрагалык милдет эң улуу депутат катары Анвар Артыковго жүктөлдү.

Мандат берүү аземине Борбордук шайлоо комиссиясынын мүчөлөрү толук курамы менен катышып, анын төрагасы Туйгуналы Абдраимов 4-октябрдагы шайлоого 69 өлкө, 40 эл аралык уюмдан 1000ге жакын байкоочулар келгенин айтып жатып, шайлоодо айрым эреже бузуулар болгонун да моюнга алды.

- Өткөн шайлоонун өзүнүн кемчиликтери болду. Ар бир чоң иште кемчилик болбой койбойт экен. Айрым мыйзам бузуулар, айрым эреже бузуулар катталды. Бирок бул жалпы шайлоонун жыйынтыгына таасирин тийгизе алган жок. Эми алдыда шайлоо мыйзамдарын өзгөртүп, чогуу алдыга жылабыз деп ойлойм.

Өзгөчө ант бергендер

120 депутаттын ант берүүсү эки саат убакытты алды. Негизинен баары антты кыргыз тилинде берсе, үч депутат гана аны расмий тилде окууну эп көрдү. Депутаттар Рыскелди Момбеков менен Кожобек Рыспаев анттын тексттин окубастан, жатка айтып бергени менен өзгөчөлөндү. Ал эми азиз депутат Дастан Бекешевдин ант берүүсү өзгөчө кол чабууга арзыды.

Депутаттардын арасында буга чейин “Республика Ата-Журт” партиясынын тизмесинен чыгарылып, бирок Жогорку Сот тарабынан кайра тизмеге киргизилген алты талапкер да мандат алышты. Алардын бири Аида Исмаилованын айтуусунда, алдыда өзү шайланып келген “Республика Ата-Журт” партиясы менен эле бирге иштөө ниети бар. Анын үстүнө партиядан дагы "мындан ары бир бололу" деген мааниде кайрылуулар болгон.

- Мен шайлоочуларга берген убадаларым үчүн аягына чейин турдум. Мен эми алар үчүн иштеп берем деп айта алам. Алдыда болсо "Республика Ата-Журт" менен гана бирге болом. Башка жакка бөлүнүп кетейин деген оюм жок. Партиядан дагы болор иш болду эми, бир бололу деп атышат.

Аида Исмаилова: "Республика Ата-Журт" менен бирге болом

Партлидерлер фракцияларды да башкарат

Депутаттардын расмий ант берүүсүнөн кийин фракциялардын түзүлүшү тууралуу лидерлердин расмий маалыматы угулду. Маалым болгондой парламентке өткөн партия лидерлери ошол эле кезде фракция башчылары да болуп калышты. “Бир Бол” партиясынын фракция башчылыгына Алтынбек Сулайманов шайланганын теңтөрагалардын бири Мыктыбек Абдылдаев айтты:

- Биз бир добуш менен Алтынбек Сулаймановду шайладык. Ошол эле учурда фракция лидеринин орун басарын дагы шайладык - ал Чолпон Жакупова болду.

Парламенттик фракциялардын маанайына караганда, Жогорку Кеңеш күн тартибине чыгара турган алгачкы маселелердин бири депутаттык артыкчылыктардан баш тартуу маселеси болчудай. КСДП, "Ата Мекен" партиялары батир, жардамчы, кол тийбестик өңдүү кызматтардан баш тартарын жарыялаганга жетишти. Шайлоо өнөктүгүнүн учурунда да жарандык активисттер талапкерлерди депутаттык жеңилдиктерден баш тартууга чакырышкан.

4-октябрда өткөн парламенттик шайлоодо 14 партия ат салышып, алтоо утуп чыккан.

Жогорку Кеңешке бул жолу мурдагы чакырылыштын депутаттарынын 33% келди. Мандат алган аялдар 19% түзөт.

пикирлерди көрсөт

XS
SM
MD
LG