Линктер

жекшемби, 11-декабрь, 2016 Бишкек убактысы 16:10

Москвада мигранттар кармалды


Москвадагы рейд "кылмыштуу топко эмес, мигранттарга каршы жүргүзүлүп жатканы" укук коргоочуларды тынчсыздантууда, 30-июль, 2013

Москвадагы рейд "кылмыштуу топко эмес, мигранттарга каршы жүргүзүлүп жатканы" укук коргоочуларды тынчсыздантууда, 30-июль, 2013

Москвада полиция шаардагы базарларда рейд өткөрүп, жүздөгөн мигранттарды кармап кетти. Соңку рейд өткөн аптанын этегинде “Матвеевский” базарында полиция кызматкерлерин ур-токмокко алган кылмыштуу топко каршы көрүлгөн аракет болуп калды. Ал арада орус улутчулдары “полицияга жардам беребиз” деген таризде Петербургда жашылча саткандарды полисмендердин көзүнчө кодулашты.

27-июлда Москва полициясы “Матвеевский” базарынан 15 жаштагы кызды зордуктаган кишини издеп жатканда адамдардын тобу менен кагылыша кеткен. Бир полициячы ошол окуяда башы жарылып, ооруканага түшкөн болчу.

“Бойго жете элек кызды зордуктаган”, “полициячыны урган” деп шектелгендер колго түшүрүлдү. Зордуктаган болушу мүмкүн деп Магомед Магомедов кармалганын, полицияга кол көтөргөнү үчүн анын жездеси Магомед Расулов менен эжеси Халимат Расулова кармалышканын айтышты.

Полиция аларды кармап эле токтоп калган жок. “Москванын базарларын кылмыштуулуктан тазалайбыз” деген ураан менен алар шейшембинин таңында эле үч базардан 500гө жакын адамды кармап кетишти.

Москва полициясынын башчысы Анатолий Якунин шейшембиде ооруканада жаткан полициячыны көрүп чыккандан кийин журналисттерге сүйлөп, алар мыйзамсыз миграцияга каршы кантип күрөшүп жатышканы жөнүндө айтты.

"Биз мыйзамсыз миграция боюнча 250дөн ашуун кылмыш ишин козгодук. Алардын ичинде 60 иш - өз үйүнө 25 адамдан 1000 адамга чейин мигрантты каттатып алган үй ээлерине каршы ачылгандары. Буларды биз каймана мааниде ичине каалаганча адам бата берчү “резина үйлөр” деп коёбуз. Биз ошол мыйзамсыз келгендерди ишке алып жаткан компанияларга каршы да иштеп жатабыз", - деди шаардын башкы полициясы Якунин.

Москванын базарларында постсоветтик өлкөлөрдөн жана Орусиянын көбүнчө мусулмандар отурукташкан Түндүк Кавказ республикаларынан жүз миңдеген мигранттар келип иштейт.

Өлкөнүн Федералдык миграциялык кызматынын башчысы Константин Ромодановский маалымат жыйынында сүйлөп жатып, азыр Орусияда расмий каттоодон өтүп иштеген чет өлкөлүк мигранттардын саны 1.8 млн. экенин, ал арада мыйзамсыз иштегендер 3.5 млн. дон ашып кеткенин айтып, алар тараптан жасалып жаткан кылмыштар “кабыл алынгыс” деп билээрин белгиледи.

"Бул чыдап болбой турган нерсе. Мындайга жол берилбеши керек, - деди Ромодановский. - Мен эч кимге насаатымды берейин же кырдаалга таасир этейин деген ниетим жок, бирок жөнөкөй адам катары муну өтө катаал чаралар менен токтотуш керек деп эсептейм. Анткени биздин эрежелер, мыйзамдар бузулуп жатпайбы. Биз өзүбүздү-өзүбүз урматтай билишибиз керек да, бул өңдүү окуяларды болтурбаш үчүн колдон келгендин баарын жасашыбыз зарыл".

Миграция боюнча өлкөдөгү биринчи адам Ромодановский “мен таасир этүүнү каалабайм” дегени менен, анын сөзүн орус коомунун мурдатан эле чет өлкөлүктөргө тетири карап келген улутчул бөлүгү кайсыл бир деңгээлде "тымызын колдоо" катары кабыл алды дешет укук коргоочулар.

“Жарандык көмөктөшүү” деп аталган укук коргоо уюмунун төрайымы Светлана Ганнушкина өлкөдөгү азыркыдай масштабдуу камоолор Орусияда ксенофобиянын кайрадан күчөшүнө алып келет деп билдирди.

Ал арада интернетте дал ошол ойду тастыктаган видео-клиптер пайда боло баштады.

Өздөрүн “мыйзамсыз жашылча-жемиш саткандарга каршы чыккандар” деп атагандар Петербургдун көчөлөрүн, базарларын аралап, жашылчанын түрлөрүн сатып отургандарды текшере башташат. Алар полициянын ролун аткарып, мигранттарын документтерин текшерип, уруп-сабап, тилдеп, мунун баарын видеого тартышат. Болгондо да окуяга полиция күбө болуп турганына карабай, улутчул жаштарды токтотууга эч кандай аракет көрбөйт.

Кыргызстандын Москвадагы элчилигинен “Азаттыкка” билдиришкендей, азырынча Москванын базарларында рейд жүргүзүлгөн жерлерде кыргызстандыктар кармалган-кармалбаганы тууралуу маалымат жок. "Кыргыздар Москвада көбүнчө "Строгино", "Мытищи" базарларында көп кездешет. "Матвеевскийде" жана башка базарларда рейдде кармалгандардын арасында кыргызстандыктар бар-жоктугу тууралуу бизге айтыша элек", - деди элчиликтин юристи Мырзабек Карагулов.
  • 16x9 Image

    Төрөкул Дооров

    "Азаттыкта" 2002-жылдан бери иштейт. 2007-жылга чейин Москвадагы кабарчысы, 2009-жылга чейин Бишкекте “Азаттык плюс” жаштар программасынын редактору катары иштеди. 2004-жылы Москва мамлекеттик университетинин журналистика факультетин аяктаган.

пикирлерди көрсөт

XS
SM
MD
LG