Линктер

бейшемби, 8-декабрь, 2016 Бишкек убактысы 14:26

XXX жайкы Олимпиада оюндары башталды. Британ баш калаасы 3-ирет тоскон дүйнөлүк спорт майрамына даярдыктар 7 жыл жүрдү.

Лондондун Олимпиада стадионундагы 3 саатка созулган театрлашкан салтанатка 80 миң көрүүчү күбө болсо, жер шарында 1 миллиардан ашуун киши сыналгыдан тиктеди. 70 күн жол жүрүп, дүйнөнүн төрт бурчун айланган Олимпиада шамаласын көтөргөн атлеттер Темза дарыясы аркылуу өтүп келип, стадиондогу XXX жайкы Олимпиа оюндарынын отун жандырды. Олимпиада оту мелдеш өткөн 16 күн бою жаркырап күйүп турат.

Олимпиада шамаласын көтөргөндөр мэр Жонсон менен

Олимпиада шамаласын көтөргөндөр мэр Жонсон менен

Дүйнөнүн 204 өлкөсүнөн келген 10 миңден ашуун спортчу Олимпиаданын алтын, күмүш жана коло медалдары үчүн таймашат.

Лондон шаарынын мэри Борис Жонсон Кытайдын ССТV каналына сүйлөп жатып, британ баш калаасы 4 жылда бир жолу өткөн жайкы Олимпиада оюндарына толук даярдыгын билдирген:

- Олимпиаданын тарыхында оюнду өткөргөн башка шаарлардай эле биз бул майрамга даярбыз жана биздин камылгабыз мактанаарлык. Мындай чоң иште баары тегиз шайма-шай деп айтуу да кыйын. Андай болсо дагы бизде баары жайында десек болот.

Олимпиаданын коопсуздугун 40 миңден ашуун атайын күчтөр, анын ичинде 18 миң аскер камсыздайт. Британ тарыхында бейкут заманда мынчалык күчтүн атайын операцияга биринчи тартылуусу.

- Эгер сиз Олимпиадага катышкан атлеттерди сөзгө тартып көрсөңүз, алар өздөрүн коопсуз сезээрин айтышат. Командалар болсо машыгууда. Атлеттер менен куралданган коопсуздук кызматкерлери чогуу-чаран өз милдеттерин так аткарууда.

XXX Олимпиа оюндарын ачуу салтанатында Европадагы эң чоң коңгуроо кагылып, дүйнөлүк спорт майрамына байсалдуу сапар тиледи. Британ канышасы Элизабет II менен канзаада Филип Букингэм сарайында олимпиаданын ачылышына келген мамлекет жетечилери жана өкмөт башчыларын кабыл алышууда.

Лондонду жаркылдаган оттор коштогон театр менен музыканын мухитине айлантууга 27 миллион фунт сарпталды. Көптү күттүргөн мындай жомокту көрөм дегендерге билеттин баасы 1 жарым 2 миң фунт турат.

Кыргызстан Лондонго 14 спортчусун аттандырды. Алар спорттун 10 түрү боюнча таймашат. Өлкөбүз жайкы олимпиадага аялдар күрөшү жана жел кайык спорту боюнча алгачкы ирет катышууда. Кыргызстандын көп улуттуу курама командасынын эң кенжеси – сууда сүзүүчү Дарья Таланова 16 жашта болсо, 19 жаштагы балбан Айсулуу Тыныбекова дүйнөлүк мелдешке кыргыз аялдарынын ичинен биринчи аттанат. Ал эми Данияр Көбөнов, Арсен Эралиев, Магомед Мусаев дүйнөнүн мыкты балбандарынын катарында аталып жүрөт.

  • 16x9 Image

    Гүлайым Ашакеева

    "Азаттыктын" Прагадагы кеңсесинин кызматкери, журналист, веб-редактор. Кыргыз улуттук университетин, Коста Рикадагы Улуттар Уюмунун университетин аяктаган.

пикирлерди көрсөт

XS
SM
MD
LG