Линктер

шаршемби, 7-декабрь, 2016 Бишкек убактысы 04:02

Украинанын Херсон облусунда аннексияланган Крымга электр берүү үзгүлтүккө учурады.

Херсон облусундагы электр берүү линиясынын жанына топтолгон нааразылык акциясынын катышуучулары техникалык ремонт бригадасына электр мамыларын калыбына келтирүүгө мүмкүнчүлүк беришкен жок. Мунун натыйжасында Крымдагы эки миллионго жакын калк үч күндөн бери электр жарыгысыз калды. Буга байланыштуу Крым жарым аралына өзгөчө кырдаал киргизилди.

Ошол эле кезде Херсондогу акцияга чыккан жарандык активисттер тобу украин бийлигинен Крымга электр энергиясын берүүнү биротоло токтотууну талап кылууда.

Кыйраган электр мамылары

Жарандык активисттер Украинанын Херсон облусундагы Крымга кетчү жогорку чыңалуудагы электр берүү линияларын кайтарууну улантышууда. Укук коргоо органдары бул нааразылык акциясына көз салганы менен, бул жолу анын катышуучуларын тилкеден сүрүп чыгарууга далалат кыла элек.

20-ноябрда болжол менен бул тилкедеги танкка каршы минанын жарылуусунан улам Украинадан Крымга кеткен электр мамылары кыйраган болчу.

“Укрэнерго” компаниясы мунун натыйжасында атомдук электр станциялары авариялык өчүрүүгө дуушар болгонун жарыялаган. Ошондуктан Украинадан Крым жарым аралына жана Севастополь шаарына берилген электр энергиясы токтотулган болчу.

Севастополдун Турак жай коммуналдык чарба департаментинин жетекчи орун басары Андрей Демин кырдаалды жөнгө салуу боюнча атайын штаб түзүлгөнүн айтты:

- Мында бардык кызматтар ар кандай кокустуктарды алдын алуу үчүн жогорку деңгээлдеги даярдыкка келтирилди. Шаардагы бардык дизель-генераторлор текшерүүдөн өткөрүлдү. Учурда бизде Севастополь шаарында 217 даана дизель-генератордук түзүлүш бар. Алардын көпчүлүгү негизинен шаардагы бала- акча, мектеп, оорукана сыяктуу социалдык объекттерде жайгашкан. Эмне болгон күндө дагы биз аталган социалдык объекттерди электр энергиясы менен камсыздай алабыз.

Крымдагы энергетикалык каатчылыкка байланыштуу түзүлгөн өзгөчө кырдаалдан улам, жарым аралда ички генераторлордон берилчү электр жарыгы менен сууну үнөмдөп пайдалануу чаралары киргизилди. Бирок жергиликтүү бийлик дизель-генератордук түзүлүштөрдүн жардамы менен жарым аралды элүү пайызга жана кыска убакытка гана камсыздоо мүмкүн экенин белгилешкен болчу.

21-ноябрь түнү Херсондогу электр мамыларынын кыйрашынан улам Украинанын материк бөлүгүнөн Крымга кеткен электр линиясы үзгүлтүккө учураган болчу. Өткөн ишемби күнү электр мамыларын кайрадан калыбына келтирүүгө тоскоолдук кылган жарандык активисттер менен тартип сакчыларынын ортосунда жаңжал чыгып, мушташ болгон эле.

Мына ушундай курч карама-каршылыктан улам Херсон облустук бийлиги кыйраган электр мамыларын оңдоо иштери андагы жарандык активисттер менен тынчтык сүйлөшүүлөрдөн кийин гана улантыла турганын билдирген. Бирок каршылык акциясына чыккан жарандык активисттер тобу украин бийлигинен Крымга электр энергиясын берүүнү биротоло токтотууну талап кылышууда.

Крым жарым аралы 2014-жылы март айында Орусия тарабынан аннексияланып, Москва аны өзүнүн карамагына кошуу боюнча референдум өткөргөн болчу. Бирок ал референдумдун жыйынтыгын эл аралык коомчулук тааныган эмес.

пикирлерди көрсөт

XS
SM
MD
LG