Түркия Орусиянын Су-24 истребителин атып түшүрүүгө байланышкан окуяны көбүртүп жабыртпай, мындан ары да өз чек арасын коргоону уланта берерин бул өлкөнүн президенти Режеп Тайып Эрдоган билдирди. Стамбулда бүгүн өткөн экономикалык конгрессте сөз сүйлөп:
- Тилекке каршы бири-бирибизге каршы чыгуунун ачуу даамын татып жатабыз. Бул окуя Түркия мурда макулдашкан кызматташтык эрежелерин сактоонун алкагында болду. Түркия коңшуларына карата эч качан күч колдонбойт, - деди.
Эрдоган Орусиянын учагы Түркиянын аба мейкиндигиндеги чекти өткөндөн кийин атылганын, буга Түркия аймагына түшкөн учактын калдыктары да далил экенин кайталап, Су-24 учуп бара жаткан жерде “Ислам мамлекети” тобунун согушкерлери жок экенин айтты.
Германиянын канцлери Ангела Меркел Эрдоганды Су-24 истребителине байланыштуу кырдаалды жөнгө салууга чакырганын Германиянын Focus журналы жазып чыкты.
