Кош курултай: бийлик өзүнчө, оппозиция өзүнчө
23-марттагы Ынтымак курултайына жер-жерлерден өкүлдөрдүн көбү шайланып, четтеги эмгек мигранттары менен президент тарабынан дайындалчу 150 өкүл тизмеси тактала элек. Саясий партиялар парламентинин Бишкекте өткөн «тегерек үстөл» жыйынында Ноорузга тушташ өтчү кош курултайда каралчу маселелер, саясий күчтөрдүн мунасага келиши жайында кеп болду.
Алайда И.Исаковду боштондукка чыгарууну талап кылган элдик жыйын x
Алайда И.Исаковду боштондукка чыгарууну талап кылган элдик жыйын
Жарыяланган учуру: 16.02.2010
Мунаса болот-болбойт
Саясий партиялардын, биртоп эларалык уюмдардын өкүлдөрү катышкан жыйында “Улуу биримдик” партиясынын төрагасы Эмилбек Каптагаев азыркы шартта мунасага келүү мүмкүн эместигин ырастап, анын себеп-жөнүн мындайча түшүндүрдү.
- Мунаса кылганга бийлик деле аракет кылган жок. Алар ойлоп атат. Биз катуураак сүйлөгөндөрүн коркутуп алабыз. Өтө катуу кеткенин өлтүрүп салабыз. Корккону качып кетет. Ошондон калганы унчукпай баарына макул болуп отуруп берет деп. Мына ушул саясат болуп турганда коомдо туруктуулук, тынчтык, бейкутчулук болбойт.
Президенттик катчылыктын жооптуу кызматкери Темир Жумакадыров Ынтымак курултайы бийлик менен жарандык коомдун ортосундагы өз ара түшүнүүчүлүктүн ыңгайлуу аянтчасына айланат деген пикирде.
- Биз ошол жергиликтүү деңгээлде кызыкчылык топтордун өкүлдөрүн чогултуп алып биз сүйлөшөлү деген курал кылып атабыз. Ошол жерди пикир алышчу аянтча кылып алып ушундай эле отуруп бири-бирибизге ой-пикирибизди айтып, бири-бирибиз менен сүйлөшүп алалы, деген курал болуп атат.
Саясий партиялар парламентинин жетекчиси Роза Акназарованын пикиринде, түшүнүү үчүн эки тарап бирин-бири угушу абзел.
- Бир тарап эле чогулуп алып баарысы жакшы деген гана сөз болсо анда ынтымакка келбейт. Бири айтып атат, оппозиция эми өзүбүзчө чогулабыз деп. Өкмөтчүлөр өзүнчө чогулса каяктагы ынтымак болгону.
Шайлоонун шайы кеткенде
Эларалык Улуттук демократия институтунун Бишкектеги өкүлчүлүгүнүн жетекчиси Скот Кирин жарандык коом менен бийликтин мамиле-катышы шайлоо институтунда көрүнүшү керек эле деген пикирде.
- Эгер өкмөт элдин пикирин билгиси келсе аны шайлоо аркылуу билүү мүмкүнчүлүгү бар. Мен курултайга караганда калыс шайлоо жакшы деп айттым.
Европа коопсуздук жана кызматташуу уюмунун Бишкектеги өкүлчүлүгүнүн жетекчиси Эндрю Тесорьер аркыл пикирлердин коомдо жаңырыктап турушу өлкөнүн демократиялык өнүгүшүнө жол ачарын белгилеп, андай өлкөгө инвесторлор да арбын келерине токтолду.
- Курултайдын ийгиликтүү өтүшү, анда аркыл пикирлердин айтылышын эсепке алуу үчүн ага бардык саясий күчтөр жана жарандык коом өкүлдөрү активдүү катышуусу зарыл.
“Акшумкар” партиясынын төрагасы Темир Сариев Кыргызстанда таза шайлоо институтунун баркы кеткенден кийин мунаса, ынтымак курултайын чакыруунун өзү Башмыйзамга каршы келерин билдирди. Бийлик демилгеси менен жасалып жаткан иш-чаранын максаты президент К.Бакиевдин жүргүзүп жаткан жаткан саясатын мактоого алуу экенин көрсөттү.
- “Айкөлмүн, мен чакырып атам баарыңарды. Кел отуралы сүйлөшөлү, эмне маселеңер бар” десе, бул башка жөн болмок. Анан тиги Азиза Абдырасулова айткандай пенсионер менен мугалимдерди чогултуп алып туруп анан кийин ошолордун кол чабуусу менен “мен жакшымын” деген бул туура эмес!
Бийлик менен жарандык коомдун, саясий күчтөрдү мунасага чакыруу милдетин аркалап жаткан кезектеги иш-чара оппозиция өкүлдөрүнө каршы кысым күчөп, энергия акысы опсуз көтөрүлүп, “Түндүкэлектр” менен “Кыргызтелеком” акционердик коомдорунун мамлекетке тиешелүү акциялары жарыбаган баага сатылып, ансыз да жону жука калктын чыдамы түгөнүп бараткан чакка туш келүүдө. Ошон үчүн президент демилгеси менен чакырылып жаткан Ынтымак курултайына атаандаш Элдик курултай өткөрүү белгиленүүдө.