Р.Жээнбеков: Баяндама К.Бакиевдин легитимсиздигин көрсөттү
АКШнын Мамдепартаменти Адам укуктарын коргоону жүзөгө ашыруу боюнча 2009-жылдык баяндамасын жарыялады. Кыргызстан тууралуу бөлүгүндө адам укуктарынын бир катар көйгөйлөрү белгиленет. АКШда жашаган оппозициялык саясатчы, “Ата Мекен” партиясынын мүчөсү Равшан Жээнбеков жарыяланган баяндамадагы Кыргызстанга берилген баа тууралуу өз пикири менен бөлүшөт.
Мамлекеттик департаменттин билдирүүсү боюнча Кыргызстандагы азыркы абал абдан кыйын
Жарыяланган учуру: 13.03.2010
- Бул жолку баяндамада Кыргызстанга мурдагы жылдарга караганда башкача мамиле болгон. Жаңы эки көрсөткүч кошулган, биринчиси биздин бийликтин оппозицияга болгон мамилеси, экинчиси Кыргызстандагы бейөкмөт уюмдардын абалын өз-өзүнчө бөлүк кылып беришкен.
АКШнын мамлекеттик департаменти К. Бакиев жеңип чыккан президенттик шайлоону тааныбай тургандыгын дипломатиялык жол менен билдирди
Мамлекеттик департаменттин билдирүүсү боюнча Кыргызстандагы азыркы абал абдан кыйын. Алар өзгөчө И. Исаковду, Э. Бөлөкбаевди жана аны менен жаткан эки кыргыздын Петровкадагы жигитин, А. Жекшенкуловду бөлүп карап, өзгөчө көңүл бурушкан. Мен атын атаган адамдарга биздин бийлик тарабынан атайын токулган кылмыш иши тагылганын эл аралык укук коргоо органдарынын маалыматына таянып тастыкташат.
Алар биринчи кезекте 2009-жылы өткөн Кыргызстандагы президенттик шайлоого көңүл бурушкан. Президенттик шайлоого көзөмөл жасаган эл аралык уюмдарга таянып, Кыргызстанда шайлоодо оппозицияга мүмкүнчүлүк берилбегенин, оппозиция өкүлдөрүнө жалган кылмыш иштери ачылып шайлоо таза өтпөгөнүн билдирет.
Муну менен АКШнын мамлекеттик департаменти Кыргызстанда өткөн К. Бакиев жеңип чыккан президенттик шайлоону тааныбай тургандыгын дипломатиялык жол менен билдирди.
- Мамкатчы Клинтон адам укутарын коргоо жаатында маалымат каражаттары жана бейөкмөт уюмдар негизги күчтөр деп баса белгиледи. Сиз буга кошуласызбы? - Х. Клинтон бул жолку сөзүндө дагы эки нерсеге басым жасады: биринчиси, күзүдө Улуттар Уюму тарата турган Адам укуктары боюнча билдирүүгө АКШ дагы өз көз карашын кошо тургандыгын; экинчиси, ар кайсы мамлекеттердеги бейөкмөт уюмдарга көбүрөөк көңүл буруп, колдоо көрсөтүлөөрүн айтты.
- Кыргыз коомчулугу Мамдепартаменттин ушул жарыялаган баяндамасын талдап, андан жыйынтык чыгаруусу зарылбы?- Х. Клинтон жаңы эле сүйлөгөн өзүнүн 5 минуталык сөзүндө бул доклад Америка коомчулугу, өзгөчө өкмөтү, мамлекеттик кызматкерлери, дипломаттары үчүн негизги көрсөтмө болот деп айтты.
Буга кошумча, биз-Кыргызстандын оппозициясы көтөрүп жүргөн маселе – К. Бакиевдин легитимсиз президент экендигин дүйнөнүн башка мамлекеттерине минтип дипломатиялык жол менен билдирип жатышат.
- Рахмат, Равшан мырза!