Евробиримдик Кыргызстанга беш млн евро жардам көрсөттү

- Саламатсызбы, Кристина айым. Менин биринчи суроом, Евробиримдиктин гуманитардык жардамы кимге жана кандай формада таратылып жатат?

-Биз бүгүнкү күнгө чейин “Кызыл Чырым”, Бириккен Улуттар Уюму жана “АКТЕД” деген уюмдар аркылуу беш миллион евро котордук. Биз кыргыздарга да, өзбектерге да негизинен тамак-аш менен жардам берип жатабыз. Андан тышкары элдерди дары-дармек менен да камсыз кылуудабыз. Оштогу жергиликтүү ооруканаларга жана бейтапканаларга да көмөк көрсөтүү менен бирге үйсүз калган адамдарды материалдык жактан колдоого аракет кылуудабыз. Биздин дагы бир эң негизги максатыбыз - жергиликтүү калктын коопсуздугун камсыз кылуу болуп саналат. Муну ишке ашырууга биз азыркы колубуздагы каражат мене эле чектелип калбастан, келечекте да акча бөлөбүз.

- Кыргызстандын массалык маалымат каражаттары, деги эле өкмөттөгү адамдар Ош окуялары учурунда элди, эл аралык журналисттерди толук маалымат менен камсыз кылган жок деген сөздөр айтылды. Сиз ошого кошуласызбы?

- Мен Бишкекте өкмөт менен жолукканымда алардын абдан ачык экенин байкадым. Президент Роза Отунбаева эл аралык иликтөөлөрдү жүргүзүүгө кызыктар экен жана ошого багытталган кадамдарды жасап жатыптыр. Чын эле, эгер окуялар боюнча иликтөөлөр Кыргызстан тарабынан гана жүргүзүлсө, анын натыйжалары элдин ишеничине ээ боло албайт. Оштогу адамдар менен жолукканымда алар мага азыркы өкмөткө ишенбегенин билдиришип, бейтарап, көз карандысыз жана терең иликтөөлөрдү каалагандарын айтышты.

- Евробиримдиктен келечекте да жардам күтүүгө болобу же иш чаралар ушу менен чектелеби?

-  Жок, жок. Чектелбейт. Жогоруда айтылган беш миллион евродон тышкары биз дагы кошумча жети миллион евро болүүнү пландаштырып жатабыз. Бул акча келе жаткан шайлоолорго, мыйзам чыгаруу жараяндарына жана Ошту калыбына келтирүүгө жумшалат. Мындан кийин да кошумча жардам керек болсо, биз дайыма ачыкпыз.

- Рахмат маегиңизге.