ЭЛДИК КУРУЛТАЙ БИЙЛИККЕ ӨЗ ТАЛАПТАРЫН ЖАРЫЯЛАДЫ (сүрөт баян)
Бүгүн саат 12де Кожомкул атындагы спорт ордосунда “Акыйкат үчүн” кыймылы уюштурган Элдик курултай өз ишин баштады. Жыйынга республиканын ар бир аймагынан келген 1474 делегат катышып, 15 кишиден турган президиумду шайлашты.
Жарыяланган учуру: 12.04.2008
Курултайды “Акыйкат үчүн” коомдук кыймылынынын координациялык кеңешинин төрагасы
Аликбек Жекшенкулов ачып алып барды.
Алгачкы сөздү “Ата Мекен” партиясынын лидери
Өмүрбек Текебаев алды. Ө.Текебаев өз докладында азыркы бийлик жүргүзүп жаткан саясат Кыргызстандын келечегине балта чабат деп, башкы байлыгы болгон энергетика тармагы менен кен байлыктарын менчиктештирүү бир гана адамдын кызыкчылыгы үчүн жасалып жатат деп билдирди.
Андан соң “Акыйкат үчүн” кыймылынын координатору
Темир Сариев өлкөнүн экономикалык абалына арналган доклад жасап, экономикадагы башкы оору-коррупция, жумушсуздук, баанын өсүшүнө тоскоолдуктун жоктугу жана мыйзамсыздык деп билдирди.
Коомдук парламенттин төрагасы
Абдыганы Эркебаев 3 жыл мурда болгон март ыңкылабынан кийин саясатта да, экономикада да, социалдык тармакта да эч өзгөрүү болгон жок, конституциялык реформа тескерисинче бир адамдын бийлигин бекемдеген натыйжага алып келди деп билдирди. А.Эркебаев кырдаалды оңдоо үчүн демократиялык принциптерге кайтуу зарыл, ал үчүн президенттик шайлоого чейин аракет көрүү керек экендигин кошумчалады.
Жаштардын “Мен ишенбейм” кыймылынын лидери
Жоомарт Сапарбаев Каркыра жайлоосунун жана пансионаттардын Казакстанга берилишине каршылык билдирип жаткан жаштарды бийлик камап, соттоо жолу менен коркутуп-үркүтө албастыгын белгиледи.
Элдик курултайга келген делегаттарга манасчылар “Манас” эпосунан үзүндү айтып, өнөрүн көргөзүштү.
Бүбүкан Досалиева, Аманбек Жапаров, Бишкек