“Битлз” тобунун мурдагы менежери адам өлтүргөн деп күнөөлөнүүдө

3-февралда АКШнын Калифорния штатында атактуу музыка продюсери Фил Спектор кармалып, бир миллион доллар акчаны күрөгө койгондон кийин убактылуу бошотулду. Полициянын айтымында, Спектор адам өлтүргөндүгү үчүн күнөөлөнүүдө, бирок өлгөн аялдын аты-жөнү жана анын Спекторго ким болгону тууралуу маалымат жарыяланбайт. 1960-жылдарда Спектор - атактуу "Роллинг стоунз" тобунун продюсери болгон. "Битлз" тобунун менежери Брайан Эпстейн 1967-жылы каза болгондон кийин, Спектор "Битлзге" өтүп, алардын даңкын арттырган. Фил Спектор атактуу Элвис Пресли, Эрик Клэптон, мурдагы битл Жон Леннон жана башкалардын ырларын жаздырган.


Нарын АЙЫП, Прага