БИШКЕК. Кыргызстандын Ички иштер министрлигинде 4 күндөн бери телефон байланышы жок. Бул тууралуу бүгүн министрликтин басма сөз кызматынын башчысы Жолдошбек Бусурманкулов маалымдады. Анын айтымында, телефон байланышынын жоктугу министрликтин бир катар жоопкерчиликтүү башкармалыктарынын ишине жолтоо болууда. Ал эми ИИМдин тез байланыш бөлүмүнүн башчысынын орун басары Шекербек Бочолоевдин маалыматына караганда, ИИМдин буга чейинки телефон байланышы үчүн карызын төлөгөнгө Финансы министрлиги акча бөлгөн эмес. Азыр министрлик телефон байланышы үчүн 12 млн. сом карыз.
