БИШКЕК. Бүгүн жаш кинорежиссер Нурбек Эген “Айдардын сүйүүсү” кинотасмасын тартуу максатында кинотобу менен Ысыккөл облусуна кетишти. Кинотасма Кичижаргылчак, Чоңжаргылчак, Актерек айылдарында жана көл кылаасынын кооз жерлеринде тартылуусу каралган. Фильмдин башкы ролуна Канн кинофестивалынын жеңүүчүсү Наташа Ренье чакырылган. Ал эми башкы каарман Айдардын ролуна “Тунгуч” театрынын актеру Болот Тентимишев бекитилген. Эл аралык долбоор менен тартылып жаткан бул кинотасманы Германия, Франция, Орусия тарап каржылап, “Санжыра” студиясы экранга алып чыгат.
